Jekk dan ma jġiblekx tbissima llum, ma nafux x’jista jġiblek! L-MSPCA qasmet ritratti ta’ grupp ta’ ġriewi ċkejknin li waslu fix-xelter u diġà qed jisirqu l-qlub ta’ ħafna.
Minn Spud, Okra, Beet, Sprout, Zucchini, Radish, Chilli, Maize, Pea u Bean, dawn iċ-ċkejknin huma kollha taħlita ta’ Chihuahua u, minkejja d-daqs tagħhom, diġà qed jagħmlu differenza kbira.
Fosthom spikka b’mod partikolari Pea, li bħalissa jiżen biss 600 gramma. Minkejja dan il-piż żgħir, l-MSPCA qalet li għandu “6,000 kilo ta’ ħlewwa”, frażi li turi kemm dan il-ġeru ż-żgħir diġà qed iħalli impatt fuq kull min jiltaqa’ miegħu.
L-MSPCA fakkret kemm hu importanti l-appoġġ tal-pubbliku biex annimali bħal dawn jingħataw ċans jikbru f’ambjent sigur, mimli mħabba u kura.
“Ma naqtgħux qalbna minnhom. Jekk jogħġobkom, la taqtgħux qalbkom minna,” qalet l-organizzazzjoni, waqt li rringrazzjat lil dawk kollha li jgħinu biex dawn il-ħajjiet żgħar ikollhom futur aħjar.
Facebook/MSPCA
