Hekk kif Awla irritorna bi staġun ġdid, Joseph Agius qasam riflessjoni mill-qalb dwar ir-rabta speċjali li bena ma’ dan il-programm matul is-snin. “Ftit ieħor u nibdew, staġun ġdid, sett ġdid, kapitlu ġdid ta’ Awla,” kiteb Joseph, hekk kif żvela li dan se jkun il-ħames staġun tiegħu mal-programm.
Għalih, Awla huwa ferm aktar minn sempliċiment programm televiżiv. Fil-fatt, iddeskrivieh bħala dak il-“baby” li ra jikber sena wara l-oħra. Matul dan il-vjaġġ, il-programm mhux biss tah esperjenza professjonali, iżda wasslu biex jiltaqa’ ma’ mijiet ta’ persuni u jisma’ stejjer differenti.
“Programm li għallimni ħafna, laqqagħni ma’ mijiet ta’ nies u tani ċ-ċans nisma’, nara u nmiss mill-qrib mijiet ta’ stejjer differenti apparti li fetaħli opportunitajiet kbar,” stqarr. Joseph ammetta wkoll li s-sodisfazzjon li tah Awla huwa wieħed li ftit proġetti oħra rnexxielhom jagħtuh. Madankollu, wara dak li jaraw it-telespettaturi hemm tim sħiħ li jaħdem biex kull staġun ikun jista’ jitwassal bl-aħjar mod possibbli.
B’ton umoristiku, Joseph qal li t-tim “kuljum naħdmu u niġġieldu kważi daqs kemm naħdmu,” iżda enfasizza li lkoll għandhom l-istess għan: li jagħtu l-aqwa prodott possibbli lil dawk li jsegwuhom. Huwa temm il-messaġġ tiegħu billi rringrazzja lill-krew u lill-ħaddiema kollha ta’ ONE, kif ukoll lil dawk kollha li jaċċettaw li jaqsmu l-istejjer tagħhom waqt intervisti jew jagħtu l-kontribut tagħhom permezz ta’ vox pop.
“Għax fl-aħħar mill-aħħar, Awla mhux aħna, imma Awla intom,” temm jgħid Joseph, filwaqt li esprima x-xewqa tiegħu li dan l-istaġun il-ġdid ikun suċċess ieħor.
Facebook / AWLA
