Pawlu Borg Bonaci qasam messaġġ mill-qalb fuq il-midja soċjali wara l-aħħar tislima lill-għażiż missieru, Karm, fejn irringrazzja lil dawk kollha li attendew il-funeral u wrew solidarjetà mal-familja f’dan il-mument diffiċli. F'isem il-familja tiegħu, Pawlu esprima l-gratitudni kbira tiegħu lejn il-ħafna nies li attendew biex jagħtu l-aħħar tislima lil missieru, kif ukoll lejn dawk li bagħtu messaġġi, ċemplu jew offrew kliem ta’ faraġ.
Huwa stqarr li l-familja kienet tassew kommossa bl-imħabba u l-appoġġ li rċeviet, filwaqt li rringrazzja lil kulħadd talli għamel din l-aħħar ċelebrazzjoni tal-ħajja ta’ missieru waħda tant speċjali u memorabbli. Iżda l-aktar parti emozzjonanti tal-messaġġ kienet meta Pawlu żvela ġest personali li għamel biex jonora l-memorja ta’ missieru.
Matul din il-ġimgħa, minkejja l-uġigħ kbir li kien għaddej minnu, Pawlu ħadem żewġ wardiet taz-zokkor, li hu u oħtu mbagħad offrew waqt il-quddiesa tal-funeral. B'idejh jitriegħdu u b'qalbu tqila, huwa ħoloq dawn il-wardiet bħala simbolu tal-imħabba lejn missieru, li kien għallmu din is-sengħa b'tant paċenzja u dedikazzjoni.
Pawlu spjega li ma setax jimmaġina mod aktar sinifikanti kif jagħti ġieħ lil missieru milli billi joffrilu xi ħaġa li tant kien iħobb u li kien tant passjonat dwarha. “Jistgħu jkunu biss żewġ wardiet taz-zokkor, iżda għalija jġorru fihom ħajja sħiħa ta’ memorji, tagħlim u mħabba,” kiteb Pawlu. Huwa temm il-messaġġ tiegħu bi kliem li żgur imiss il-qlub ta’ ħafna: “Grazzi ta’ dak kollu li għallimtni, Pa. Din id-darba dawn il-wardiet kienu għalik. Grazzi, Pa. Il-vjaġġ it-tajjeb, Karm.”
Ġest mill-isbaħ li juri kif it-tagħlim u l-imħabba ta’ ġenitur jibqgħu jgħixu f’uliedu, anke wara li ma jibqax magħna. Mill-ġdid, aħna minn Gwida.mt insellmu l-memorja ta’ Karm u nwasslu l-kondoljanzi sinċieri tagħna lil Pawlu u lill-familja kollha tiegħu. Strieħ fis-sliem.
Facebook / Pawlu Borg Bonaci
