Il-Viċi Sindku ta’ Birżebbuġa, Josette Busuttil, qasmet messaġġ personali u profond li laqat lil ħafna fuq il-midja soċjali, kitba umana sal-qiegħ nett.
F’riflessjoni mimlija emozzjoni, hija ddeskriviet lilha nnifisha bħala persuna li forsi mhux dejjem tinftiehem minn soċjetà li tħares lejn il-wiċċ u tinsa x’hemm ġewwa. Tkellmet dwar il-fatt li ħafna drabi għażlet li timxi “mal-qiegħ”, mhux għax ma setgħetx titla’, iżda għax minn hemmhekk tgħallmet il-veritajiet l-aktar profondi tal-ħajja.
Hija sostniet li x-xogħol tagħha ħafna drabi jkun sieket u inviżibbli, mhux maħsub għar-ritratti jew għall-applaws, iżda għall-qlub li fejqet u għat-tama li reġgħet xegħlet f’dawk li kellhom bżonnha. “Hija tagħti biċċiet minn ruħha mingħajr ma titlob xejn lura,” kitbet, filwaqt li ammettiet li anke l-aktar qalb b’saħħitha xi kultant tgħejja.
Il-messaġġ tagħha kien wieħed ta’ vulnerabbiltà iżda wkoll ta’ saħħa. Tkellmet dwar tbissima li ddawwal, iżda għajnejn li raw dmugħ; dwar li tkun hemm għal kulħadd, anke meta ftit huma dawk li jisimgħu tassew. U fl-aħħar, waslet l-aktar frażi li baqgħet iddur f’moħħ ħafna, “Din il-persuna… jien.”
F’soċjetà fejn ħafna drabi naraw biss il-pożizzjoni u mhux il-persuna, il-kliem ta’ Josette Busuttil kien tfakkira li wara kull rwol pubbliku hemm qalb li tħoss, li tiġġieled u li xorta tagħżel li tqum kuljum u tkompli tagħti.
Facebook / Josette Busuttil
