Il-kompożitur u mużiċist lokali minn Ħal Qormi, Craig Saliba, għadu kif temm sena ta’ studju intens f’Berklee College of Music fil-kampus tagħha f’Valenzja, Spanja – esperjenza li ddeskriva bħala waħda li bidlitlu ħajtu, kemm artistikament kif ukoll professjonalment.
Grazzi għall-għajnuna finanzjarja mill-Malta Arts Scholarship, iffinanzjata mill-Gvern ta’ Malta, u mill-BOV Joseph Calleja Foundation, Craig irnexxielu jipparteċipa fil-programm prestiġjuż Scoring for Film, Television and Video Games. Il-kors iħejji lill-kompożituri biex jaħdmu fl-industriji kreattivi tal-awdjo-viżiv – setturi li qed jikbru b’pass mgħaġġel madwar id-dinja.
Craig, li għandu wkoll Baċċellerat u Masters fil-Kompożizzjoni tal-Mużika mill-Università ta’ Malta, qal li minkejja l-preparazzjoni akkademika qawwija tiegħu, Berklee offriet esperjenza kompletament differenti. Il-programm kien iffukat fuq l-applikazzjoni prattika tal-kompożizzjoni f’ambjenti professjonali, u mexa lill-istudenti mill-ewwel idea kreattiva sal-produzzjoni finali ta’ silta mużikali.
Fost l-aktar aspetti prattiċi tal-kors, l-istudenti tħarrġu fl-użu ta’ softwer speċjalizzat bħal Pro Tools u Logic Pro, kif ukoll fl-orkestrazzjoni, il-ħidma ma’ mużiċisti professjonali, u r-rekording f’ambjenti reali.
Wieħed mill-aqwa mumenti għal Craig kien meta kellu ċ-ċans jidderieġi u jirrekordja l-mużika tiegħu fi studjos f’Budapest u fl-AIR Studios f’Londra – l-istess studjos fejn ġew irrekordjati soundtracks leġġendarji bħal The Lord of the Rings, Gladiator u The Dark Knight. “Esperjenza li tatni għodod imprezzabbli li diġà qed napplika fil-karriera tiegħi,” qal Craig.
Matul is-sena, ħadem fuq diversi kollaborazzjonijiet internazzjonali, inkluż il-kompożizzjoni tal-mużika għal logħba oriġinali bl-isem Tiris, f’kollaborazzjoni mal-università ESAT fi Spanja. Għall-proġett finali tiegħu, ingħaqad mal-filmmaker Malti Bradley Farrugia biex jaħdmu fuq dokumentarju qasir dwar il-baħar Malti – ffilmjat f’Malta, b’mużika rrekordjata Londra, u ppreżentat fiċ-ċentru kulturali ta’ Valenzja.
Craig qal li l-esperjenza f’Berklee mhux biss għenitu jikber bħala artist, imma saħħitu wkoll bħala professjonist li issa qed iħares lejn futur f’dinja kreattiva dejjem tinbidel. Issa li rritorna Malta, beħsiebu jinvolvi ruħu b’mod attiv fl-industrija lokali tal-midja u l-arti, b’ħsieb li jikkollabora ma’ kreattivi oħra u jgħin iressaq il-livell tal-produzzjoni mużikali f’Malta għal standards internazzjonali.
Huwa rringrazzja b’mod speċjali lill-Malta Arts Scholarship Scheme u lill-BOV Joseph Calleja Foundation għall-appoġġ finanzjarju, kif ukoll lill-familja, il-ħbieb u l-għalliema tiegħu għall-appoġġ matul dan il-vjaġġ. “Dan kien biss il-bidu,” qal Craig. “U ninsab eċitat li nwassal dak li tgħallimt lura f’Malta.”
