Ħaż-Żebbuġ jinsab imsikket bin-niket wara t-tħabbira tal-mewt ta’ Ġużi “Il-Majjistra” Schembri, persuna magħrufa u maħbuba minn ħafna għaż-Żebbuġin, partikolarment għall-ħidma tiegħu fuq il-paġna soċjali “Ħaż-Żebbuġ, Nies, Laqmijiet u Ġrajjiet”.
Diversi persuni qasmu messaġġi emozzjonanti b’sellem il-memorja tiegħu, fosthom Mariella Mizzi Attard li kitbet, “X’aħbar kerha dalgħodu! Ġużi Schembri (l-Majjistra) ħalliena.” Hija ddeskrivietu bħala bniedem li permezz tal-paġna li waqqaf “għaqqad liż-Żebbuġin”, filwaqt li talbet għall-familja tiegħu biex isibu s-sabar f’dan iż-żmien diffiċli.
Anke l-paġna Il-Papa Jħobbok Ukoll sellmet il-memorja tiegħu, fejn iddeskrivietu bħala “persuna ta’ qalb kbira, ċajtier u dejjem jara kif jista’ jgħin”. Huma semmew ukoll il-kuraġġ tiegħu matul il-marda li ġġieled fl-aħħar snin ta’ ħajtu, filwaqt li baqa’ attiv fil-komunità u fuq il-midja soċjali.
Min-naħa tiegħu, Mark Camilleri qal li ż-Żebbuġin kollha jinsabu b’sogħba kbira għal din it-telfa. Huwa fakkar fil-konversazzjonijiet li kien ikollu ma’ Ġużi u fil-mħabba kbira li kellu lejn Ħaż-Żebbuġ u n-nies tiegħu.
“Strieħ fis-sliem, Ġużi. Il-memorja tiegħek tibqa’ tgħix fina għal dejjem,” kiteb Mark. Ġużi “Il-Majjistra” Schembri se jibqa’ mfakkar bħala persuna li ħalliet impatt pożittiv fuq ħafna nies, kemm permezz tal-umoriżmu tiegħu kif ukoll tal-imħabba kbira lejn il-lokalità tiegħu u l-komunità Żebbuġija.
Facebook / Guzi Il-Majjistra Schembri
