Bosta persuni esprimew ix-xokk u d-diqa tagħhom wara li tħabbret il-mewt ta’ Robert Cardona, espert forensiku. Fuq il-mezzi soċjali qed jinqasmu diversi messaġġi ta’ kondoljanzi u tifkiriet minn persuni li kienu jafuh. Fost dawn kien hemm messaġġ li fakkar il-karattru u l-personalità ta’ Robert, kif ukoll il-mumenti li qasam ma’ dawk ta’ madwaru.
“Ħallejtna lkoll bla kliem, biss din id-darba b’uġigħ li l-kliem ma jistax jispjega,” intqal fil-messaġġ. Robert ġie deskritt bħala persuna bi spirtu ħieles u b’karattru distintiv. Fit-tislima jingħad li huwa diffiċli li wieħed jaċċetta li persuna tant mimlija ħajja tista’ f’daqqa waħda ssir memorja.
“Imma x’memorja ħallejt warajk, Robert – il-karattru tiegħek, il-preżenza tiegħek, il-mumenti li qsamna u l-persuna li kont.” Il-messaġġ jintemm bi kliem ta’ tislima, “Tkun fejn tkun, nittama li sibt dik l-istess libertà li ruħek dejjem fittxet. Se nħossu n-nuqqas tiegħek aktar milli qatt tista’ timmaġina. Sakemm nerġgħu niltaqgħu.”
L-aħbar wasslet għal diversi reazzjonijiet fuq il-mezzi soċjali, b’ħafna jwasslu l-kondoljanzi tagħhom lill-familja u lill-qraba ta’ Robert. Minn Gwida.mt, inwasslu l-kondoljanzi tagħna lill-familja u lill-għeżież tiegħu f’dan il-mument diffiċli. Strieħ fis-sliem, Robert.
Facebook / Robert Cardona
