Ixxerja

Il-Katakombi ta’ San Pawl fir-Rabat kisbu rikonoxximent storiku hekk kif saru l-ewwel sit f’Malta li ngħata ċ-Ċertifikat tal-Patrimonju Ewropew. Biex tfakkar din il-kisba prestiġjuża, Heritage Malta organizzat attività speċjali li ħadet lill-viżitaturi lura fiż-żmien permezz ta’ esperjenzi interattivi, dawriet gwidati u rikreazzjonijiet ta’ drawwiet minn żmien ir-Rumani.

Dan ir-rikonoxximent, mogħti aktar kmieni din is-sena, jagħmel lill-Katakombi ta’ San Pawl parti minn netwerk ta’ siti Ewropej magħżula għall-importanza storika u kulturali tagħhom, kif ukoll għall-kontribut li taw fit-tiswir tal-identità Ewropea.

Il-Katakombi ta’ San Pawl huma l-akbar kumpless ta’ dfin tal-perjodu klassiku f’Malta, bi storja li tmur lura għaż-żminijiet Puniċi, Rumani u Biżantini. Dak li jagħmel dan is-sit partikolarment speċjali huwa l-fatt li fih jinsabu oqbra Lhud, politeistiċi u Nsara, li jixhdu l-koeżistenza ta’ twemmin differenti tul is-sekli.

Matul iċ-ċelebrazzjonijiet, il-pubbliku seta’ jsegwi rikreazzjoni ta’ purċissjoni funebri Rumana, li kompliet b’rappreżentazzjoni ta’ ikla tradizzjonali li kienet issir mill-familjari tal-mejjet ħdejn il-qabar. Il-programm inkluda wkoll żjarat gwidati, sessjonijiet mal-kuraturi u attivitajiet edukattivi għat-tfal, fosthom tfittxija għat-teżor u esperjenza ta’ skavar arkeoloġiku.

Għal din l-okkażjoni attendew il-Kummissarju Ewropew Glenn Micallef, il-Ministru Malcolm Paul Agius Galea, id-Direttur tal-Bureau taċ-Ċertifikat tal-Patrimonju Ewropew Vincente Curie u ċ-Chairman ta’ Heritage Malta Mario Cutajar.

Intant, Heritage Malta qed tħares lejn aktar investiment fis-sit sabiex tkompli ttejjeb l-esperjenza tal-viżitaturi. Fost il-pjanijiet hemm it-tiġdid taċ-ċentru tal-viżitaturi u tal-ispazji tal-wirjiet, il-ħolqien ta’ padiljun edukattiv, żona apposta għall-attivitajiet ta’ skavar għat-tfal u ż-żgħażagħ, kif ukoll aktar għażliet ta’ lingwi fil-gwida bl-awdjo.

Permezz ta’ dawn l-inizjattivi, Heritage Malta għandha l-għan li tkompli tagħti prominenza lill-valur storiku u Ewropew ta’ dan is-sit uniku fil-qalba tar-Rabat.

Ixxerja

Miktub Minn

Emil Calleja Bayliss

Iħobb il-lingwa Maltija u jsegwi b’mod attiv ix-xena mużikali lokali. Id-dinja tal-ispettaklu taffaxxinah u l-għaxqa tiegħu jara xows differenti. Biex jirrilassa Emil jieħu gost imur ħdejn il-baħar u fil-kampanja, hemm isib ftit kwiet ’il bogħod mill-ġenn.

Issa

“Tilfet Darha Mingħajr Ebda Ħtija” – Chloe Għandha Bżonn L-Appoġġ Tagħna

Kyle Zarb Illum

Chloe, kelba ta’ 10 snin, issib kenn u mħabba fis-santwarju tal-Association for Abandoned Animals. L-assoċjazzjoni laqgħet fil-familja tas-santwarju tagħha lil Chloe, kelba ta’ 10 snin li, minkejja d-diffikultajiet li għaddiet minnhom dan l-aħħar, qed turi n-natural ħelu tagħha ma’ dawk ta’ madwarha.F’messaġġ fuq il-paġna tagħha, l-assoċjazzjoni spjegat li Chloe malajr serqet il-qlub tal-voluntiera bil-ġentilezza tagħha. […]