F'attività kkaratterizzata minn sensittività u kuxjenza soċjali, l-iskola sekondarja tal-Kulleġġ Santu Wistin fil-Pieta' fakkret il-Jum Dinji għall-Għarfien dwar is-Saħħa Mentali (World Mental Health Awareness Day). L-iskola kollha ngħaqdet f'dinja ta' kulur hekk kif kulħadd ġie mistieden jilbes l-aħdar—il-kulur uffiċjali marbut ma’ din il-kawża importanti—biex jibgħat messaġġ ċar li s-saħħa mentali u l-benesseri emozzjonali huma prijorità għal kulħadd.
Matul assembly speċjali, l-edukatriċi Ms Vittorja Bianco indirizzat lill-istudenti dwar ir-realtà li kull wieħed u waħda minna jgħaddi minn żminijiet diffiċli fil-ħajja, filwaqt li saħqet fuq l-importanza kruċjali li wieħed ma jibżax jitkellem u jfittex l-għajnuna. L-avveniment kompla b'intervista ma' Matthew Camilleri, eks student tal-kulleġġ li matul dan is-sajf kien ta' eżempju kbir hekk kif mexxa inizjattiva biex jiġbor fondi b'risq ir-Richmond Foundation. L-istudenti kellhom ukoll l-opportunità diretta li jiltaqgħu miegħu u jagħmlulu d-domandi tagħhom.
Biex din l-inizjattiva tħalli impatt dejjiemi fil-ħajja ta' kuljum tal-istudenti, tħejjiet noticeboard speċjali fejn tqassmu bookmarks b'pariri prattiċi u messaġġi ta' sapport għal dawk il-mumenti fejn l-affarijiet iħossuhom ftit aktar diffiċli, pass ieħor favur ambjent edukattiv mimli empatija u kura reċiproka.
Facebook/St Augustine College
