Tas-Sliema tinsab tibki t-telfa ta’ wieħed mill-aktar karattri magħrufa u maħbuba fil-festa ta’ Stella Maris, magħruf minn kulħadd bħala “Il-Major”. Dan ħareġ minn messaġġ emozzjonanti li tellgħet Soċjetà Filarmonika Stella Maris A.D. 1914, fejn sellmu l-memorja tiegħu u fakkru kemm kien persuna preżenti u dedikata lejn il-festa Slimiża.
“Il-Major” kien wieħed minn dawk il-persuni familjari li diffiċli timmaġina l-festa mingħajru. Kull sena kien ikun preżenti fit-toroq Slimiżi, qrib il-każin, jattendi l-marċi, l-attivitajiet u ċ-ċelebrazzjonijiet li jagħmlu l-festa ta’ Stella Maris waħda tant speċjali għall-komunità.
Fil-messaġġ tagħhom, is-soċjetà ddeskrivietu bħala persuna sempliċi u riservata, iżda b’qalb kbira u b’imħabba sinċiera lejn Tas-Sliema u l-festa tant għal qalbu. “‘Il-Major’ kien persuna sempliċi, riservata, iżda b’qalb kbira u b’imħabba sinċiera lejn Tas-Sliema u l-festa ta’ Stella Maris,” kitbu.
Il-president, il-kumitat u l-membri tas-soċjetà taw ukoll il-kondoljanzi tagħhom lill-familja u lill-ħbieb tiegħu, filwaqt li sellmu l-memorja tiegħu b’messaġġ sempliċi iżda mimli tifsira: “Strieħ fis-sliem Major. Il-memorja tiegħek tibqa’ magħna.”
Bosta kienu dawk li rreaġixxew għall-aħbar b’messaġġi ta’ sogħba u tifkira, fejn ħafna fissru lil “Il-Major” bħala parti mill-identità tal-festa Slimiża u persuna li kienet tagħti ħajja u karattru lill-atmosfera tal-festa.
