Il-Malta Fashion Week 2026 fetħet uffiċjalment nhar it-Tnejn b’serata li tat bidu għal ġimgħa ddedikata għall-kreattività, is-sengħa u l-innovazzjoni, fejn il-moda ssir mezz ta’ espressjoni li tiċċelebra l-individwalità, il-kultura u l-arti.
Matul il-jiem li ġejjin, l-avveniment se jlaqqa’ flimkien disinjaturi stabbiliti, talenti emerġenti u professjonisti tal-industrija li qed ikomplu jsawru l-futur tal-moda f’Malta u lil hinn minnha.
Il-lejla tal-ftuħ kienet imżejna wkoll bil-preżenza ta’ mistednin distinti kemm internazzjonali kif ukoll lokali. Fost dawn kien hemm Fern Mallis, meqjusa bħala l-persuna li tat il-ħajja lill-format modern ta' New York Fashion Week.
Iż-żjara tagħha f’Malta kienet possibbli grazzi għall-kollaborazzjoni bejn The Phoenicia Malta u l-Ambaxxata tal-Istati Uniti f’Malta.
Attendew ukoll l-Ambaxxatriċi tal-Istati Uniti għal Malta, l-Eċċellenza Tagħha Somers Farkas, kif ukoll Rachelle Borg Dingli, li komplew iżidu mal-prestiġju tas-serata.
L-ewwel sfilata kienet dik tad-disinjatur James Dimech bil-kollezzjoni Textures of the Sea, li affaxxinat lill-udjenza b’ħolqien ta’ ilbies skulturali magħmul mill-karta u ispirat mill-pajsaġġi marittimi Maltin.
Oana x Queen’s Lane Couture preżentaw il-kollezzjoni Divinity in Motion, li esplorat il-bilanċ bejn il-ġentilezza u s-saħħa permezz ta’ siluwetti kuraġġużi, drappijiet lussużi u dettalji raffinati.
Il-marka internazzjonali Unikimono, immexxija mid-disinjatur J. Aki Navarro, ippreżentat kollezzjoni ta’ cover-ups unisex versatili ispirati mill-ispirtu boemjan ta’ Tulum, mill-influwenzi Mediterranji u mill-identità kostali ta’ Malta.
Is-serata għalqet bi preżentazzjoni innovattiva minn Vanusia Hair Design, immexxija mill-hairstylist rebbieħa ta’ diversi unuri Vanusia Mifsud Vella.
Wara s-sfilati, il-mistednin komplew iċ-ċelebrazzjonijiet waqt l-after-party uffiċjali fejn il-mużika ta’ DJ Deji ta’ Vibe FM tat tmiem enerġetiku għall-bidu tal-Malta Fashion Week 2026.
Malta Fasion Week 2026
