Il-kantanta Jessika ħabbret il-ħruġ tal-kanzunetta l-ġdida tagħha li ġġib l-isem ta’ Empire, li hi tinsab fuq il-pjattaformi diġitali kollha kif ukoll fuq l-istazzjonijiet tar-radju. Din il-produzzjoni hija kollaborazzjoni ma’ Stefan Moessle, produttur Ġermaniż-Amerikan. F’din il-kanzunetta Jessika tgħaqqad il-messaġġ ta’ tama, għaqda u reżiljenza ma’ produzzjoni pop moderna.
Waqt dehra reċenti tagħha waqt il-Malta Football Awards, Jessika tat preview esklussiv ta’ Empire, li ġie milqugħ b’entużjażmu immedjat. Il-kanzunetta hija innu emozzjonali u qawwi li jitkellem direttament dwar il-mumenti li qed ngħixu bħalissa.
Bi kliem b’saħħtu, Jessika tistieden lill-udjenza tagħha biex jgħollu rashom ‘il fuq mill-ġudizzji u d-diviżjoni, u flok jagħżlu l-empatija, id-dawl u s-saħħa interjuri. Empire tirrifletti kemm il-maturità artistika tagħha kif ukoll il-passjoni li għandha biex toħloq mużika b’tifsira.
Nistgħu ngħidu li Empire tikkonferma li Jessika mhix biss kantanta – imma vuċi li tispira.
