Il-President tal-Parlament Ewropew, Roberta Metsola, ħabbret li llum jidħol fis-seħħ l-Att Ewropew dwar l-Aċċessibbiltà. Dan se jagħmilha aktar faċli għall-persuni b’diżabilità biex jaċċessaw servizzi u prodotti.
“Illum, jidħol fis-seħħ l-Att Ewropew dwar l-Aċċessibbiltà, immexxi mill-Parlament Ewropew,” kitbet Metsola.
“Huwa pass importanti li se jiżgura li tant prodotti u servizzi jsiru aċċessibbli għal persuni b’diżabilità. Se nkomplu nibnu Ewropa aħjar għal kulħadd.”
L-Att Ewropew dwar l-Aċċessibbiltà jiddeskrivi standards ġenerali ta’ aċċessibbiltà għall-prodotti u s-servizzi kollha fl-ambitu tiegħu b’rekwiżiti addizzjonali għal prodotti u servizzi speċifiċi.
Għall-prodotti, in-negozji għandhom:
• Jiddisinjaw prodotti biex jimmassimizzaw l-użabilità għal individwi b’diżabilità;
• Jipprovdu struzzjonijiet aċċessibbli għall-użu u l-manutenzjoni;
• Jiżguraw li l-ippakkjar u s-servizzi ta’ appoġġ ikunu aċċessibbli;
Għas-servizzi, ir-rekwiżiti jinkludu:
• Jiżguraw li l-websajts u l-apps mobbli jkunu aċċessibbli;
• Jipprovdu informazzjoni dwar il-karatteristiċi tas-servizz f’formati aċċessibbli;
• Joffru sistemi ta’ appoġġ għall-klijenti li jaqdu lil persuni b’diżabilità
Facebook / Roberta Metsola
