L-organizzazzjoni ta’ Miss Universe Malta sellmet lil Julia Ann Cluett b’messaġġ mill-qalb hekk kif tagħlaq il-kapitlu tagħha bħala r-reġina renjanti tal-kompetizzjoni. F’messaġġ mimli emozzjoni, it-tim irringrazzja lil Julia Ann talli rrappreżentat lil Malta "bi grazzja, determinazzjoni u kburija", filwaqt li fakkru l-mumenti storiċi li nkisbu matul ir-renju tagħha.
"Flimkien ksibna tragwardi li se jibqgħu mfakkra għal dejjem, għamilna storja għal Malta u wrejna li l-ħolm jista’ jsir realtà bil-passjoni, ix-xogħol iebes u t-twemmin," kiteb it-tim. L-organizzazzjoni qalet ukoll li Julia Ann ħalliet marka li ma titħassar qatt, mhux biss fi ħdan Miss Universe Malta iżda wkoll fil-qlub ta’ dawk kollha li kellhom il-privileġġ jaħdmu magħha.
"Il-qalb tajba, ir-reżiljenza u d-dedikazzjoni bla waqfien tiegħek ispirawna kuljum," komplew jgħidu, filwaqt li sostnew li kienet waħda mill-akbar unuri tagħhom li jarawha tirrappreżenta lil Malta fuq il-palk internazzjonali. Għalkemm issa m’għadhiex iżżomm it-titlu ta’ Miss Universe Malta, l-organizzazzjoni temmen li dan huwa biss il-bidu ta’ kapitlu ġdid f’ħajjitha, b’ħafna opportunitajiet u suċċessi oħra quddiemha.
Huma temmew il-messaġġ b’ringrazzjament għall-memorji, l-isfidi megħluba u l-kisbiet storiċi li ċċelebraw flimkien, u żiedu, "La darba kont ir-reġina tagħna, dejjem tibqa' r-reġina tagħna."
Facebook / Miss Universe Malta
