KM Malta Airlines ħabbret li se żżid aktar titjiriet u kapaċità addizzjonali wara domanda qawwija minn passiġġieri li qed jivvjaġġaw lejn Malta biex jivvutaw fl-Elezzjoni Ġenerali li ġejja.
Fl-ewwel jumejn minn meta nfetħu l-bookings relatati mal-elezzjoni, il-linja tal-ajru diġà rreġistrat aktar minn 1,000 passiġġier għal vjaġġi bir-ritorn. Madwar 90% ta’ dawn il-bookings ġew minn Brussell u Londra.
B’reazzjoni għal din id-domanda kbira, KM Malta Airlines kisbet is-slots meħtieġa fl-ajruporti u se topera titjiriet addizzjonali minn London Gatwick fl-20, 21, 22, 24 u 31 ta’ Mejju, kif ukoll minn Brussell fil-21, 22 u 25 ta’ Mejju.
Dawn it-titjiriet żejda huma maħsuba biex jiffaċilitaw lill-votanti li se jivvjaġġaw lejn Malta għall-votazzjoni bikrija tat-23 ta’ Mejju, kif ukoll lil dawk li se jirritornaw ftit wara Jum l-Elezzjoni fit-30 ta’ Mejju.
Il-linja tal-ajru qalet li għad hemm siġġijiet disponibbli fuq diversi dati għal dawk li qed jippjanaw li jipparteċipaw kemm fil-votazzjoni bikrija kif ukoll fil-jum prinċipali tal-elezzjoni. Ġew offruti wkoll tariffi speċjali relatati mal-elezzjoni fuq ir-rotot Ewropej skedati tal-kumpanija.
KM Malta Airlines sostniet li din l-inizjattiva se tipprovdi aktar flessibbiltà għaċ-ċittadini Maltin li jgħixu barra minn Malta u li jixtiequ jieħdu sehem fl-elezzjoni li ġejja.
Facebook / KM Airlines
