Lawrence Gray jikteb messaġġ sabiħ lill-għażiż ibnu f’għeluq sninu. “Lill-Ibni, l-ewwel nifs filgħodu li jagħtini l-konferma li għadni ħaj, ix-xemx tiegħi, is-sors tal-ferħ tiegħi, ir-raġuni li għandi għaliex ngħix din il-ħajja, ir-rigal prezzjuż tiegħi mingħand Alla. Aħjar minn kull unur, aħjar minn kull ħaġa kbira li qatt kelli fil-ħajja tiegħi, għax xejn mhu akbar minnek. Int l-akbar kisba tiegħi li timlieni b’ferħ kuljum. Grazzi lilek, tgħallimt xi jfisser li nħobb lil xi ħadd aktar milli nħobb lili nnifsi, u din l-imħabba hija bla kundizzjoni.”
Hu jkompli, “Il-ġenna hija veru, għax rajtha l-ewwel darba fil-jum li twelidt, u naraha kuljum f’għajnejk u f’dik id-daħka prezzjuża tiegħek. Xejn ma jagħmilni aktar ferħan milli naf li int ferħan, għax ngħix għall-ferħ tiegħek. Int taf li dejjem se nkun hemm għalik, imma xorta nitlob lill-Mulej biex jagħtini s-saħħa u l-għerf biex inkun il-missier ideali għalik. Missier li, jekk Alla jrid, fi ftit snin oħra tgħid li jien il-missier li dejjem xtaqt, bħal ma kien missieri għalija – mudell eżemplari li minnu tista’ titgħallem l-aktar affarijiet importanti fil-ħajja: biex dejjem tkun ġenwin, onest, ħanin, u umli.”
Lawrence iżid, “Irrid li tkun taf kemm jien u ommok ninsabu kburin bik. Diġà ksibt ħafna bil-mertu tiegħek stess, u għad għandek ħajja sħiħa quddiemek. Aħdem ħafna għal dak li temmen fih, segwi l-ħolm tiegħek, għax tista’ tikseb kulma tixtieq. Kulma għandek tagħmel hu li temmen fik innifsek u qatt ma tħalli lil ħadd, anke jien, jiddefinixxi l-valur tiegħek. Ftakar li int Gray, u llum huwa jum speċjali għalik – għeluq sninek!”
Hu jistqarr, “Ma nistax nemmen li diġà għaddew 12-il sena minn meta żammejtok f’idejja għall-ewwel darba. 12-il sena ta’ ferħ u hena pura għalija u għal ommok. Int għamilna familja perfetta. Ma nistax nagħmel ħlief nixtiqlek kull ma hu tajjeb għal dan il-jum speċjali tiegħek, u ħafna aktar snin oħra taħt il-ħarsien ta’ Alla.”
Lawrence jikkonkludi, “Ftakar li daddy jħobbok u se jħobbok dejjem aktar ma jgħaddi kull jum, sa l-aħħar nifs tiegħi u anke lil hinn minnu. Grazzi, Liam, talli int int. Grazzi talli int ibni. Happy Birthday b’ħafna mħabba, Daddy!”
Facebook / Lawrence Gray
