Żewġ ismijiet mix-xena mużikali Maltija se jkunu qed jagħtu l-kontribut tagħhom għal produzzjoni ċinematografika lokali ġdida! Il-kantant Luke Chappell u l-band punk rock Kodin Hill N’ The Pressed Pills se jkollhom il-mużika tagħhom inkluża fil-film Malti Pains Embrace.

Il-film, taħt id-direzzjoni ta’ Dan J Mallia, se jkollu bħala wieħed mill-atturi ewlenin lil Pierre Luc Pace, li kiseb popolarità permezz tal-parteċipazzjoni tiegħu fil-programm Love Island Malta. Luke Chappell se jkun qed jagħti l-kontribut tiegħu permezz tal-kanzunetta Horsemen, li se tifforma parti mill-mużika uffiċjali tal-film.
Min-naħa l-oħra, il-band Maltija Kodin Hill N’ The Pressed Pills, magħrufa għall-mużika punk rock tagħha u għall-esperjenza li kisbet permezz ta’ diversi kunċerti u tours internazzjonali, se tkun qed tagħmel l-ewwel kollaborazzjoni tagħha ma’ produzzjoni ċinematografika.

L-aħħar kanzunetta tal-grupp, Don't Tempt Me, se tkun inkluża wkoll fil-film, u b’hekk il-band se tkun qed iżżid kisba oħra mal-karriera mużikali tagħha. Din il-kollaborazzjoni tlaqqa’ flimkien artisti minn ġeneri mużikali differenti fi produzzjoni waħda, filwaqt li toħloq opportunità biex il-mużika Maltija tilħaq udjenzi ġodda permezz taċ-ċinema.
Għalkemm għad iridu jitħabbru aktar dettalji dwar il-film Pains Embrace, l-involviment ta’ dawn iż-żewġ artisti diġà qed jagħti ħjiel tal-varjetà mużikali li se tkun qed takkumpanja din il-produzzjoni.
Nistennew bil-ħerqa li nsiru nafu aktar dwar dan il-proġett ċinematografiku Malti!