Ixxerja

Tliet atleti żgħażagħ Maltin irrappreżentaw lil pajjiżna fil-Ferenc Szabo International Trophy, kompetizzjoni internazzjonali tal-irfigħ tal-piżijiet li saret ġewwa Spanja u li laqqgħet flimkien atleti taħt it-23 sena.

F’din il-kompetizzjoni ħadu sehem 11-il tim minn sitt pajjiżi, fosthom Spanja, l-Italja, il-Ġermanja, l-Ungerija u l-Gran Brittanja, fejn iż-żgħażagħ kellhom l-opportunità juru l-ħiliet u d-determinazzjoni tagħhom fuq livell internazzjonali. Fost l-atleti Maltin spikka Luke Stefan Micallef, li kiseb riżultat mill-aqwa hekk kif irnexxielu jerfa’ 103 kilogrammi fl-isnatch u 126 kilogramma fil-clean and jerk. B’total ta’ 333.08 punti, Micallef kiseb it-tielet post fil-klassifika ġenerali, kisba importanti kemm għalih kif ukoll għall-isport Malti.

Atleta Maltija oħra, Rheanna Briffa wkoll tat prestazzjoni pożittiva, hekk kif refgħet total kombinat ta’ 136 kilogramma u kisbet 204.9 punti. Intant, l-atleta Nathaniel Fenech irnexxielu jerfa’ 101 kilogramma fl-isnatch. Sfortunatament, minħabba aċċident, huwa kellu jirtira mill-kompetizzjoni qabel seta’ jlesti l-parteċipazzjoni tiegħu.

Il-parteċipazzjoni tal-atleti Maltin kienet possibbli grazzi għall-appoġġ tal-akkademja ta’ A Coruña, il-Kumitat Olimpiku Malti u SportMalta. Prosit lil dawn iż-żgħażagħ li komplew jagħmlu unur lil Malta fix-xena sportiva internazzjonali! 

Ixxerja

Miktub Minn

Eileen Cumbo Salerno

Eileen tħobb tikteb bil-Malti u tħaddan b’passjoni l-lingwa bħala edukattriċi. Għandha interess kbir fid-dinja tal-moda u l-mużika – żewġ oqsma li jgħinuha tesprimi min hi b’mod artistiku u spontanju. Il-meditazzjoni u l-qari jgħinuha tibqa’ tikber kemm fuq livell personali kif ukoll dak kreattiv.

Issa

“Ċikku L-Markiż Fit-Tmeninijiet” – Ritratt Nostalgiku Jfakkar Lil Wieħed Mill-Aktar Uċuħ Maħbubin Ta’ Wied Iż-Żurrieq 

Eileen Cumbo Salerno Illum

 Hemm ċerti persuni li maż-żmien isiru parti mill-identità ta’ post u Ċikku l-Markiż żgur li kien wieħed minnhom!Fuq il-grupp ta’ Facebook Iz-Zurrieq, ġie ppubblikat ritratt nostalġiku ta’ Ċikku l-Markiż mis-snin tmenin, akkumpanjat mill-kliem  “Ċikku l-Markiż fit-tmeninijiet.” Francis Caruana, magħruf minn ħafna bħala Ċikku l-Markiż jew il-Kaptan, kien wieħed mill-aktar uċuħ familjari f’Wied iż-Żurrieq. Għal aktar minn ħames deċennji, huwa kien jgħin lis-sewwieqa jsibu post fejn jipparkjaw, filwaqt li jilqa’ lir-residenti u lit-turisti li kienu jżuru din il-lokalità.Bil-kappell karatteristiku tiegħu ta’ kaptan, il-mustaċċi u t-tbissima tiegħu, Ċikku kien sar parti mill-esperjenza ta’ kull min kien jinżel Wied iż-Żurrieq. Huwa beda jgħin lil missieru minn meta kellu biss 13-il sena u aktar tard kompla fuq il-passi tiegħu. Sfortunatament, Ċikku ħalliena fid-9 ta’ Ottubru 2026, aħbar li qanqlet diversi messaġġi ta’ sogħba u tifkiriet sbieħ mingħand dawk li kienu jafuh.Għalkemm Ċikku m’għadux magħna, it-tifkira tiegħu żgur li se tibqa’ ħajja fil-qlub ta’ bosta Maltin.