Minkejja li ħafna drabi titqies bħala "marda moderna" minn min ma jifhimx il-profondità tagħha, il-kundizzjoni tas-Coeliac tħalli impatt serju fuq il-ħajja ta' kuljum ta' dawk affettwati. Wara kummenti li jqiegħdu f'dubju l-bżonn ta' edukazzjoni dwar din il-marda, il-paġna Gluten Free Coeliacs Malta ppubblikat sensiela ta’ testimonjanzi minn nies li jgħixu bil-konsegwenzi kontinwi tal-espożizzjoni għall-gluten.
L-esperjenzi li ġew inkollati flimkien jinkludu sintomi li jvarjaw minn uġigħ ta' żaqq intens u rimettar, sa telf ta' bilanċ, dardir, u anke deħlin fl-isptar b'urġenza minħabba "cross-contamination". Minn tfal żgħar li sofrew fis-skiet sa adulti li jħossuhom bla saħħa wara li jikkonsmaw aċċidentalment il-gluten, l-istejjer juru biċ-ċar kif din il-marda mhix biss xejra jew fantażija.
Din hija prova ċara li ħafna aktar għarfien u edukazzjoni dwar is-Coeliac huma meħtieġa fis-soċjetà. Kif sostniet il-paġna stess, kull storja għandha valur kbir minħabba li l-esperjenzi tan-nies biss jistgħu jwasslu għal aktar fehim, rispett u kuxjenza.
Facebook/Gluten Free Coeliacs Malta
