Il-komiku Malti Matthew Sant Sultana qasam messaġġ personali u mimli emozzjoni mas-segwaċi tiegħu, fejn irrifletta fuq sena li, kif stqarr hu stess, kienet fost l-aktar diffiċli mentalment għalih.
B’ton tipiku tiegħu, bejn ċajt u sinċerità, Matthew beda billi qal li “ta’ wieħed u tletin mort sal-Vatikan… mill-bogħod!”, filwaqt li rringrazzja lil kulħadd għall-messaġġi sbieħ li rċieva fl-okkażjoni ta’ għeluq sninu. Huwa ammetta wkoll li forsi se jdum biex iwieġeb lil kulħadd, iżda esprima gratitudni kbira minn qalbu.
Fost il-kliem li jmiss il-qalb, Matthew qal kif din is-sena kienet waħda iebsa mentalment, għalkemm jemmen li kollox jgħaddi. Huwa enfasizza kemm il-gratitudni hija importanti għalih, speċjalment meta jaf li mdawwar b’nies ġenwini, mit-tfajla tiegħu, għall-familja, il-ħbieb u s-segwaċi li dejjem jappoġġjawh.
Bħala komiku, Matthew tenna li l-ikbar sodisfazzjon għalih huwa li jara lin-nies jitbissmu, anke fi żminijiet diffiċli. Huwa ddeskriva dan bħala l-akbar rigal li jista’ jirċievi, u li jagħtih il-motivazzjoni biex ikompli jagħmel dak li jħobb.
Il-messaġġ tiegħu jintemm b’ħarsa lejn il-futur, hekk kif jidher determinat li jkompli ’l quddiem, b’aktar mumenti li jġibu tbissima fuq wiċċ in-nies.
Facebook / Matthew Sant Sultana
