Il-kantant Malti Kevin Borg esprima n-niket tiegħu wara li lbieraħ tħabbret il-mewt ta’ Julian Attard, li ddeskrivieh bħala “ġentlom veru.”
F’post li tella’ fuq il-midja soċjali, Kevin qal li kien fi triqtu lejn Malta minn Milan meta sar jaf bl-aħbar li l-lokalità tal-Floriana tilfet persuna tant maħbuba. Huwa fakkar il-karattru sabiħ ta’ Julian u kemm kien persuna ġentili ma’ kulħadd.
Il-kantant żvela wkoll li se jkollu l-unur li jkanta waqt il-funeral li se jsir is-Sibt li ġej. Fil-verità mhux se tkun faċli għalih, iżda lest li jagħmel minn kollox biex jagħtih tislima li jixraqlu.
“L-ikbar kondoljanzi tiegħi jmorru għall-familja kollha,” kiteb Kevin, waqt li temm il-messaġġ tiegħu b’talba biex Julian jistrieħ fis-sliem.
Il-messaġġ qanqal diversi reazzjonijiet ta’ niket u solidarjetà minn segwaċi u membri tal-komunità, li ngħaqdu biex juru l-appoġġ tagħhom lill-familja f’dan il-mument diffiċli.
Facebook/ Kevin Borg
