Il-paġna ta’ kitba Maltija ‘Ġmiel il-Pinna Maltija’ kitbet dwar frażi li spiss nużawha mingħajr wisq ħsieb iżda qatt ma nagħtu każ li ‘iktar tard’ tista’ tiskadi wkoll.
Kitbu, “Ngħidu ‘iktar tard’ bħallikieku hi garanzija. Nitkellmu iktar tard. Inċempillek iktar tard. Niltaqgħu ftit… iktar tard. Imma l-ħajja ma tagħtix garanziji ta’ ‘iktar tard’. Timxi bil-kwiet, bla waqfien u bla permess. In-nies jitbiegħdu, iż-żmien jgħaddi, u l-mumenti li npoġġu fuq wara jispiċċaw ikunu l-mumenti li qatt ma jkollna lura. Jasal jum meta leħen li ħsibt li dejjem se tisma’ jispiċċa. Il-ħarsa ta’ darba u l-kumplimenti jsiru biss monologu kreattiv f’moħħok. Is-siġġu li darba kien mimli daħk jibqa’ vojt. L-istejjer li ridt tirrakkonta, l-imħabba li ridt turi, jibdew jixxandru fis-skiet ta’ ħajja li stenniet iżżejjed.”
Żiedu jgħidu, “Huwa faċli li naħsbu li għandna l-ħin— li jkun hemm jum ieħor, ċans ieħor, ‘iktar tard’ ieħor. Imma xi bibien ma jibqgħux miftuħa għal dejjem. Xi qalb ma tibqax tistenna. U xi ċansijiet ma jiġux darbtejn. Allura ċempel issa. Għidha issa. Imxi issa. Tistenniex il-mument perfett— kultant l-isbaħ affarijiet jitwieldu fl-ordinarju ta’ kuljum. Għax ‘iktar tard’ huwa tama fraġli. U spiss, meta finalment jasal… ikun diġà tard wisq.”
Facebook / Ġmiel il-Pinna Maltija
