F’messaġġ mimli emozzjoni u passjoni, il-preżentatriċi u personalità lokali Angela Coleiro għażlet li lejlet Jum San Valentinu tagħmel dikjarazzjoni ta’ mħabba mhux tas-soltu, mhux lejn persuna, iżda lejn l-ivvjaġġar.
Fuq il-midja soċjali kitbet, “Għażiż tiegħi kemm inħobbok! Minn qabel – il-Jum it-Tajjeb ta’ San Valentinu lill-unika u vera mħabba ta’ ħajti – l-ivjaġġar.”
Minflok fjuri jew ċelebrazzjoni romantika tradizzjonali, Angela ċċelebrat il-passjoni li ilha takkumpanjaha tul ħajjitha. Għaliha, l-ivvjaġġar mhuwiex biss passatemp, iżda esperjenza li tifforma l-identità u l-perspettiva tagħha.
Hi kompliet tirringrazzja lil din “l-imħabba” għall-esperjenzi kollha li offritilha tul is-snin, “Grazzi tal-mumenti prezzjużi kollha, l-eċċitament, l-avventuri, il-passjoni, il-kultura, l-istorja, l-ikel u l-inbid, l-arti, il-folklor, il-ħarba, l-adrenalina, u tant aktar…”
Kliem li juri kemm kull vjaġġ għaliha huwa kapitlu ġdid mimli tagħlim u għarfien. Angela saħqet ukoll fuq kemm l-ivvjaġġar jiftaħ il-ħajja tagħha u jagħtiha sens ta’ libertà, “Int twessa’ l-orizzonti tiegħi u tagħtini l-ġwienaħ.”
Hija riflessjoni li ħafna jistgħu jidentifikaw ruħhom magħha. F’dinja mgħaġġla u kultant monotona, l-ivvjaġġar isir mezz ta’ ħarba, iżda wkoll mezz ta’ tkabbir personali. Mhux biss naraw postijiet ġodda, iżda nitgħallmu dwar kulturi differenti, niltaqgħu ma’ nies ġodda u niskopru aktar lilna nfusna.
Angela temmet il-messaġġ tagħha b’wegħda ċara u emozzjonanti: “Sakemm inkun b’saħħti u kapaċi, nibqa’ nimxi warajk u nħobbok dejjem, sal-aħħar ta’ ħajti.” U żiedet b’ċertezza: “Int qatt m’int tedjanti, prevedibbli jew infidili… jien ngħix għalik.”
Messaġġ li jfakkarna li l-imħabba mhijiex dejjem dwar relazzjoni bejn żewġ persuni. Xi kultant, l-akbar imħabba tkun lejn dak li jagħtik sens ta’ ħajja, li jqanqallek il-kurżità u jżommok ħaj minn ġewwa.
U għal Angela, jidher ċar li din l-imħabba għandha isem wieħed, l-ivvjaġġar.
Facebook / Angela Coleiro
