Gordon Bonello jinsab lest għal esperjenza oħra fil-Festival tal-Junior Eurovision Song Contest, hekk kif din is-sena se tkun is-sitt darba li qed jagħti l-kontribut tiegħu f’dan l-avveniment mużikali internazzjonali. Permezz ta’ messaġġ fuq il-midja soċjali, Gordon esprima l-emozzjonijiet tiegħu hekk kif qed joqrob il-jum tant mistenni. Huwa fakkar fil-vjaġġ li wasslu biex jaħdem fuq sitt edizzjonijiet differenti tal-Junior Eurovision, li saru f’Malta, fil-Bulgarija, fil-Ġeorġja u fil-Belarussja.
Matul dawn l-esperjenzi, Gordon kellu diversi rwoli importanti, fosthom dak ta’ direttur kreattiv u responsabbli mill-ispettaklu, direttur tal-filmati qosra li jintroduċu lill-parteċipanti, kif ukoll kittieb tal-mużika. Huwa spjega li l-ispirazzjoni kreattiva għal din l-edizzjoni bdiet f’Ġunju li għadda, meta għall-ewwel darba ġie f’moħħu r-ritmu "Ramdamdiri ramdamdidarara". Minn dak il-mument, l-għan tiegħu kien li joħloq spettaklu mimli enerġija li kapaċi jinħass mill-udjenza kollha.
Gordon tkellem ukoll dwar is-sigħat twal ta’ ħidma u l-iljieli li għadda jaħdem fuq dan il-proġett, filwaqt li esprima l-gratitudni tiegħu lejn it-tim kollu li kien involut fit-tħejjijiet. "Is-sitt Junior Eurovision tiegħi, u qalbi tassew mimlija," kiteb Gordon, filwaqt li spjega kemm iħossu emozzjonat u grat li fl-aħħar qed jara xhur sħaħ ta’ ħidma jingħaqdu fi spettaklu wieħed.
Huwa wiegħed li l-enerġija li tant ħadem biex joħloq se tkun qed tinħass fuq il-palk dan is-Sibt, filwaqt li temm il-messaġġ tiegħu bil-kliem: "Jien lest... Intom lesti?" Nawguraw lil Gordon Bonello u lit-tim kollu kull suċċess f’din l-esperjenza speċjali!
Facebook / Gordon Bonello
