Ġie ppubblikat studju qasir iżda interessanti dwar speċi ta’ baħrija li tista’ tkun ta’ dannu, imsejħa Resala (bil-Malti) Ficus-feeding erebid moth (Rhesala moestalis).
Din l-ispeċi ġejja minn reġjuni tropikali fl-Afrika u l-Asja, iżda dan l-aħħar instabet għall-ewwel darba fil-Gżejjer Maltin. Dan ir-rekord ifisser ukoll li din l-ispeċi hija ġdida għall-Ewropa!
Jidher li dan l-insett wasal fil-gżejjer permezz ta’ pjanti importati, madankollu, din id-darba nstab fost ikel għall-fniek f’ħanut ewlieni li jforni prodotti għall-annimali f’Għawdex.
Dan l-insett jgħix fuq il-weraq tal-Ficus, li jfisser li jista’ jsir wieħed mill-pesti jekk jinfirex.
Id-dokument jinkludi ritratti ċari u informazzjoni utli biex wieħed jagħraf dan il-farfett. Għalkemm il-pubblikazzjoni hija qasira, twissi b’mod qawwi: insetti introdotti bħal dawn jistgħu jsiru problema serja jekk ma noqogħdux attenti.
Hija tfakkira tajba dwar għaliex għandna niċċekkjaw sew il-pjanti importati u nibqgħu attenti għal speċi ġodda.
Din l-ispeċi nġabret mid-direttur ta’ The Exterminator, Arnold Sciberras, waqt spezjonijiet tal-kontroll tal-pesti. Grazzi għat-tim ta’ The Exterminator, ġie żgurat li t-tixrid ta’ din l-ispeċi ġie kkontrollat.
Il-kumpanija tixtieq ukoll tirringrazzja lill-lepidopterista, Jonathan Agius, għall-kollaborazzjoni tiegħu f’dan ix-xogħol, kif ukoll lil Jeffrey Sciberras, talli assista f’dan l-istudju.
