Il-Kulleġġ San Benedittu Sekondarja, f’Ħal Kirkop, ser jiftaħ iċ-ċelebrazzjonijiet tal-20 sena anniversarju tiegħu b’Serata Mużiko-Letterarja speċjali. L-attività ser issir nhar il-Ġimgħa, 31 ta’ Jannar fis-19:30 fit-teatru tal-iskola, fejn se jippreżentaw spettaklu kulturali uniku li jgħaqqad il-mużika, il-letteratura, u l-arti.
Matul din is-serata, il-pubbliku ser igawdi minn qari ta’ siltiet letterarji u għażla ta’ prestazzjonijiet vokali. Il-mument artistiku se jkun imsaħħaħ minn wirja ta’ pitturi u skulturi minn artisti rinomati bħal Joseph L. Mallia, Antoine Farrugia, u Darren Tanti, fost oħrajn.
Waħda mill-attrazzjonijiet ewlenin tal-lejla ser tkun il-kxif ta’ monument simboliku – ktieb kbir minqux fil-ġebla Maltija, maħdum mill-artist Antoine Farrugia. Dan il-monument huwa parti minn proġett akbar bl-isem Folji Mnaqqxa, li ġie appoġġjat minn fondi tal-Malta Arts Council. Dan il-proġett jirrifletti l-valur li l-iskola tagħti lill-kultura, l-arti u l-edukazzjoni.
L-organizzaturi jixtiequ li aktar nies jieħdu sehem u jgawdu din l-esperjenza memorabbli. Kemm jekk int dilettant tal-arti, l-mużika jew il-letteratura, din is-serata hija opportunità perfetta biex tiċċelebra 20 sena ta’ dedikazzjoni u suċċess f’kull dimensjoni edukattiva.
