F’post emozzjonanti fuq il-paġna ta’ Smiling with Jerome, Josette Frendo qasmet messaġġ ta’ ringrazzjament mill-qalb lil numru ta’ negozji Maltin li, matul is-sena kollha u mhux biss fi żmien il-Milied, jagħtu kontribut konkret lill-familji li qed jiġu megħjuna mill-fondazzjoni.
Fil-messaġġ tagħha, Josette rringrazzjat lil Daily Fresh, D Burgers u The Oven, li kull ġimgħa joffru ikel u xiri ta’ ħaxix b’xejn lil dawn il-familji. Hija saħqet li dawn in-nies ma jfittxux rikonoxximent fuq il-midja soċjali, iżda l-fondazzjoni ħasset li kienet fid-dmir tagħha li ssemmi isimhom u tħeġġeġ lill-pubbliku jixtri mingħandhom.
Josette fakkret ukoll fir-realtà diffiċli li jgħixu ħafna minn dawn il-familji, li minbarra l-ispejjeż ta’ kuljum ikollhom iħabbtu wiċċhom ma’ spejjeż kbar relatati ma’ terapiji privati u mediċini. Għalkemm hemm għajnuna mill-istat u mill-ħaddiema soċjali, xorta waħda xi familji jsibuha diffiċli biex jaslu sal-aħħar tax-xahar u jkopru l-bżonnijiet bażiċi bħall-ikel.
Hija temmet il-messaġġ tagħha billi appellat għal aktar għajnuna u solidarjetà, filwaqt li rringrazzjat lil dawk kollha li, b’mod silenzjuż iżda kostanti, jagħmlu differenza reali fil-ħajja ta’ dawn il-familji.
Facebook / Josette Frendo
