Ixxerja

X’jiġri jekk il-ferħ ma jibqax sempliċiment xi ħaġa li tħoss, iżda jsir xi ħaġa li tista’ tkejjel, timmonitorja u saħansitra tipprova ttejjeb? Din hija l-mistoqsija fil-qalba ta’ DROGI, produzzjoni oriġinali ġdida ta’ teatru u mużika minn The Busker, taħt id-direzzjoni ta’ Sean Borg. Il-produzzjoni se tgħaqqad il-mużika, it-teatru, l-umoriżmu u s-satira soċjali biex tesplora b’mod differenti t-tfittxija kontinwa tal-bniedem għall-ferħ.

L-istorja teħodna f’dinja distopika fittizja li qed tesperjenza dik li tissejjaħ “Dopamine Drought”. Hawnhekk niltaqgħu mad-“Dopa-Meter”, apparat żviluppat mill-korporazzjoni fittizja B-Corp li allegatament kapaċi jkejjel il-livelli tad-dopamina ta’ persuna u, fl-aħħar mill-aħħar, kemm hi kuntenta. Imma x’jiġri meta l-ferħ jinbidel f’sempliċi numru?

Permezz tal-istejjer ta’ tliet persuni, DROGI tesplora d-diversi affarijiet li l-bniedem jiġri warajhom biex iħoss dak il-“high” fil-ħajja ta’ kuljum. Minn relazzjonijiet u suċċess, sal-validazzjoni, l-attenzjoni, il-konsum, l-eċitament u l-istimulazzjoni. Il-produzzjoni tistaqsi jekk dak li kontinwament niġru warajh jistax, eventwalment, isir forma ta’ “droga” għalina.

It-titlu DROGI intgħażel apposta biex jipprovoka, iżda l-ispettaklu mhuwiex dwar l-użu ta’ sustanzi rikreattivi. Minflok, jittratta r-relazzjoni tagħna mal-pjaċir, il-premju, id-dipendenza u dik it-tfittxija kontinwa għal xi ħaġa oħra li tagħmilna nħossuna tajjeb. L-ispettaklu se jinkludi wkoll mużika mill-album li jmiss ta’ The Busker, Something in My Head, filwaqt li l-istorja se tkun parzjalment awtobijografika u parzjalment fittizja, b’taħlita ta’ umoriżmu teatrali u mumenti aktar vulnerabbli.

Fl-aħħar mill-aħħar, DROGI trid twassal lill-udjenza biex tistaqsi lilha nnifisha x’inhuma d-“drogi” tagħha, dawk l-affarijiet li niġru warajhom, nikkunsmaw jew niddependu fuqhom bit-tama li jagħtuna sens ta’ sodisfazzjon. U fuq kollox: il-ferħ verament jista’ jinstab billi kontinwament infittxu l-“high” li jmiss?

DROGI se tittella’ fl-14 ta’ Novembru 2026 fit-Teatru Salesjan, Tas-Sliema. Il-bibien jinfetħu fis-19:30, filwaqt li l-ispettaklu jibda fit-20:30.

Ixxerja

Miktub Minn

Emil Calleja Bayliss

Iħobb il-lingwa Maltija u jsegwi b’mod attiv ix-xena mużikali lokali. Id-dinja tal-ispettaklu taffaxxinah u l-għaxqa tiegħu jara xows differenti. Biex jirrilassa Emil jieħu gost imur ħdejn il-baħar u fil-kampanja, hemm isib ftit kwiet ’il bogħod mill-ġenn.

Spettaklu

Id-Direttur Ibbażat F’Malta Aleksa Ristović Bil-Premju Ta’ L-Aqwa Direttur Għal Illusion Of Faith

Kyle Zarb 6 ta' Ottubru, 2026

Il-produttur tal-films imwieled fis-Serbja u bbażat f’Malta, Aleksa Ristović, kiseb suċċess internazzjonali bil-film debutt tiegħu Illusion of Faith, li nġibed kollu kemm hu f’Malta.Il-produzzjoni saret b’kast u tim Malti u internazzjonali, filwaqt li l-pajsaġġi, il-postijiet storiċi u l-wirt reliġjuż ta’ Malta ntużaw bħala parti importanti mid-dinja viżiva tal-film. Il-film, li jgħaqqad il-misteru mal-fidi, jesplora temi […]