Wara snin twal jilqa’ lill-klijenti tiegħu, Tal-Petut – The Private Dining Concept ħabbar li se jagħlaq il-bibien tiegħu b’mod permanenti nhar is-Sibt 7 ta’ Novembru 2026.
F’messaġġ emozzjonanti fuq il-paġna tiegħu ta’ Instagram, it-tim tar-restorant qal li din id-deċiżjoni qed titħabbar b’sentimenti mħallta, hekk kif qed jasal fi tmiemu kapitlu mimli memorji, ħbiberiji, u mumenti li ma jintesewx. L-istorja ta’ Tal-Petut bdiet saħansitra qabel il-ftuħ uffiċjali tiegħu fl-2009. Matul is-snin, dak li beda bħala vjaġġ fil-qasam tal-ikel sar, skont it-tim, xi ħaġa ferm akbar milli qatt setgħu jimmaġinaw. It-tmexxija saħqet li Tal-Petut kien ħafna aktar minn restorant: kien parti mill-familja, mid-dar u mill-ħajja tagħhom.
Ir-restorant, li jinsab fi Triq Paċifiku Scicluna fil-Birgu, kien magħruf għall- private dining u għall-platti b’ispirazzjoni lokali, imħejjija b’attenzjoni għall-ingredjenti u għall-esperjenza tal-klijenti. It-tim irringrazzja lil kull min daħal mill-bibien tiegħu u sar parti mill-istorja tiegħu.
“Mother Nature is the Chef. We are the Cooks,” temm jgħid il-messaġġ. Għalkemm l-aħbar iġġib magħha sens ta’ nostalġija, il-kliem ta’ Tal-Petut jibqa’ wieħed ta’ gratitudni lejn dawk kollha li kienu parti minn dan il-vjaġġ.
Instagram/ @tal_petut
