Il-proċess ta’ akkwist għal impjant ġdid tal-ipproċessar tal-iskart organiku, b’investiment ta’ €75 miljun, ġie konkluż b’suċċess, u b’hekk intlaħaq pass importanti ieħor fil-qafas tal-Pjan fit-Tul għall-Immaniġġjar tal-Iskart.
Dan l-iżvilupp se jkompli jsaħħaħ l-infrastruttura tal-immaniġġjar tal-iskart f’Malta, u ġie mħabbar ġimgħa biss wara li tħabbru riżultati rekord fil-ġenerazzjoni ta’ enerġija rinnovabbli mill-iskart organiku.
Il-Kap Eżekuttiv ta’ WasteServ, Richard Bilocca, qal li l-kumpanija tibqa’ impenjata biex timmodernizza l-infrastruttura tal-immaniġġjar tal-iskart u biex tavvanza l-għanijiet ambjentali u ta’ sostenibbiltà tal-pajjiż. Huwa nnota li dan l-investiment jibni fuq l-isforzi li qed jagħmlu l-familji u n-negozji fis-separazzjoni tal-iskart.
Huwa żied li fl-2025 l-iskart organiku laħaq livell rekord ta’ 30 miljun kilogramma, fatt li juri l-impatt pożittiv tal-isforzi kollettivi.
Il-proċess ta’ akkwist, li tnieda f’Marzu tal-2025, se jwassal għall-iżvilupp ta’ faċilità moderna u avvanzata, iddisinjata biex tlaħħaq mad-domanda dejjem tikber għall-ipproċessar tal-iskart organiku. Fl-aħħar ħames snin, Malta rreġistrat żieda kostanti fil-ġbir ta’ dan it-tip ta’ skart.
Ladarba l-impjant jibda jopera, fi żmien sentejn, se jkun kapaċi jipproċessa madwar 74,000 tunnellata ta’ skart organiku fis-sena, li se jiġi kkonvertit f’enerġija rinnovabbli u f’kompost ta’ kwalità għolja, b’mod li jkompli jsaħħaħ il-mixja lejn ekonomija aktar ċirkolari.
Bħalissa, WasteServ diġà topera faċilità li tipproduċi enerġija rinnovabbli mill-iskart organiku, bi produzzjoni biżżejjed biex tipprovdi l-elettriku lil madwar 1,200 familja għal sena sħiħa. L-impjant il-ġdid se jżid b’mod sinifikanti din il-kapaċità.
Il-proġett jinkludi wkoll blokka amministrattiva u laboratorju ddedikat, u ġie mfassal biex jintegra mal-ambjent tal-madwar filwaqt li jissodisfa l-ogħla standards ambjentali u regolatorji.
Dan il-proġett huwa kofinanzjat mill-Fond ta’ Koeżjoni tal-Unjoni Ewropea, b’kontribuzzjoni ta’ madwar €45 miljun.
