AIDAN għalaq uffiċjalment mawra internazzjonali impressjonanti li matulha żar 12-il pajjiż differenti bħala parti mill-promozzjoni tiegħu għall-Eurovision Song Contest. B’dan, huwa kiser rekord personali u sar wieħed mill-aktar artisti Maltin li qatt wettaq kampanja promozzjonali estensiva ta’ dan it-tip.
Il-vjaġġ tiegħu wasslu f’diversi pajjiżi fosthom l-Awstralja, l-Awstrija, in-Norveġja, l-Iżvezja, l-Albanija, il-Bulgarija, Ċipru, il-Greċja, ir-Rumanija, ir-Renju Unit, San Marino u l-Litwanja, fejn kellu l-opportunità jsemma’ l-mużika tiegħu ma’ udjenzi ġodda u jiltaqa’ ma’ fans tal-Eurovision minn madwar id-dinja.
L-aħħar waqfiet kienu fir-Rumanija u Londra, fejn ħa sehem fil-London Eurovision Party. Dwar din l-esperjenza, AIDAN qal li kienet waħda memorabbli ħafna, “Kienet esperjenza tassew speċjali li niltaqa’ ma’ parteċipanti oħra u nqatta’ ħin mal-fans. Kien pjaċir kbir li naqsam il-mużika tiegħi ma’ nies li jħobbu l-Eurovision daqsi.” Hu żied li bħalissa jinsab jaħdem fuq verżjoni aktar b’saħħitha tal-prestazzjoni tiegħu għal Bella, b’tim dedikat warajh.
Intant, ġie kkonfermat li s-sistema tal-votazzjoni għas-semi-finali se tkun ibbażata fuq bilanċ ta’ 50/50 bejn il-ġurija professjonali u l-vot tal-pubbliku. Fit-tieni semi-finali se jivvutaw diversi pajjiżi Ewropej u internazzjonali, flimkien ma’ Franza, ir-Renju Unit u l-Awstrija li diġà jinsabu fil-finali. Il-pubbliku Malti, bħas-soltu, ma jistax jivvota għall-kanzunetta Maltija.
Issa li l-mawra waslet fi tmiemha, l-attenzjoni qed tinbidel fuq l-aħħar preparazzjonijiet hekk kif id-delegazzjoni Maltija se tivvjaġġa lejn Vjenna fi żmien ftit jiem. Malta se tikkompeti fit-tieni semi-finali fl-14 ta’ Mejju, fejn AIDAN se jitla’ fuq il-palk bil-kanzunetta Bella, mistennija jinterpreta mill-14-il post waqt ix-xandira diretta.
