L-industrija tal-alkoħol qed tiffaċċja sfida kbira hekk kif dejjem aktar żgħażagħ qed jagħżlu li ma jixorbux. Skont Bloomberg, kumpaniji ewlenin tal-birra, inbid u spirti tilfu flimkien madwar $830 biljun fil-valur tagħhom mill-2021 ’l hawn. Analisti qed jgħidu li din mhijiex sempliċiment fażi temporanja, iżda bidla kbira fl-istil ta’ ħajja, speċjalment fost il-ġenerazzjoni Gen Z.
Stħarriġ ta’ Gallup sab li 54% biss tal-adulti fl-Istati Uniti jixorbu l-alkoħol, l-inqas rata minn meta beda jinżamm ir-rekord fl-1939. Raġuni ewlenija għal dan tidher li hija aktar għarfien dwar is-saħħa. Fil-fatt, l-Organizzazzjoni Dinjija tas-Saħħa qalet li ebda ammont ta’ alkoħol mhu kompletament sigur.
Minħabba dan, kumpaniji bħal Heineken u Bacardi qed jinvestu aktar fi prodotti mingħajr alkoħol, hekk kif id-domanda għal dawn ix-xorb qed tkompli tiżdied. Fil-fatt, il-bejgħ ta’ xorb mingħajr alkoħol żdied b’30%, sinjal ċar li l-konsumaturi qed ibiddlu l-għażliet tagħhom.
