Is-sewwieq żagħżugħ Malti Jacob Micallef se jkun qed jagħmel pass importanti fil-karriera tiegħu hekk kif ġie kkonfermat li se jikkompeti f’numru magħżul ta’ rounds tal-GB3 Championship mat-tim rinomat Hitech Grand Prix. Id-debutt tiegħu se jsir fil-Hungaroring, fl-Ungerija, bejn it-2 u l-5 ta’ Lulju, filwaqt li jkompli l-impenji tiegħu fil-Kampjonat Spanjol tal-Formula 4 ma’ Campos Racing.
Ta’ 16-il sena biss, Micallef se jsir l-ewwel sewwieq Malti fl-istorja li jikkompeti f’dan il-livell prestiġjuż tal-motorsport internazzjonali. Minkejja li din hija l-ewwel sena tiegħu fil-kompetizzjoni tas-single-seaters, wara karriera b’saħħitha fil-karting li ratlu diversi riżultati fuq il-podju, Jacob diġà wera l-potenzjal tiegħu. Fil-fatt, fit-tieni round tal-Kampjonat Spanjol tal-Formula 4 f’Portimão, huwa rnexxielu jikseb il-pole position, kisba impressjonanti għal sewwieq li għadu fil-bidu tal-vjaġġ tiegħu f’din il-kategorija.
Qabel ma beda l-istaġun attwali, Micallef kien ukoll ħa sehem fil-Kampjonat tal-Formula 4 tal-Arabja Sawdija lejn tmiem l-2025. Issa, bl-appoġġ ta’ Hitech Grand Prix – wieħed mill-aktar timijiet ta’ suċċess fil-motorsport Ewropew, b’titli fil-Formula 2, Formula 3 u l-GB3 Championship – Jacob se jkollu opportunità oħra biex juri l-kapaċitajiet tiegħu f’wieħed mill-aktar kampjonati kompetittivi għas-sewwieqa żgħażagħ.
F’kummenti tiegħu, Jacob Micallef qal, “Jien tassew eċitat li se ningħaqad ma’ Hitech għal dawn it-tiġrijiet fil-GB3 Championship. Li nagħmel il-pass lejn kampjonat li jinsab biss pass wieħed ’il bogħod mill-FIA Formula 3 fl-ewwel staġun tiegħi huwa opportunità inkredibbli. Ma nistax nistenna biex nitgħallem u niżviluppa bħala sewwieq ma’ tim professjonali bħal dan. Li nġorr il-bandiera Maltija f’dan il-kampjonat ifisser kollox għalija, u se nagħmel minn kollox biex nagħmel lil pajjiżi kburi. Nirringrazzja lill-familja tiegħi, lill-isponsors, lit-tim maniġerjali tiegħi u lil Hitech talli emmnu fija.”
Min-naħa tiegħu, il-Maniġer tat-Tim tal-GB3 Championship ta’ Hitech, Phil Blow, esprima s-sodisfazzjon tiegħu għall-wasla ta’ Micallef fit-tim. “Huwa ta’ pjaċir għalina li nħabbru lil Jacob għal numru ta’ rounds tal-kampanja tagħna fil-GB3 Championship u li nagħtu opportunità oħra lil talent żagħżugħ biex javvanza fil-livell li jmiss tas-single-seater racing. Minkejja li għadu fil-bidu tal-karriera tiegħu, huwa diġà ħalla impressjoni pożittiva fil-Formula 4 Spanjola u adatta ruħu tajjeb ħafna wara l-esperjenza tiegħu fil-karting. Nemmnu li din hija l-opportunità ideali biex juri l-potenzjal tiegħu f’livell ogħla u nistennew bil-ħerqa li nilqgħuh fit-tim f’Budapest ix-xahar id-dieħel.”
Id-debutt ta’ Jacob fil-GB3 Championship jirrappreżenta pass ieħor importanti fit-telgħa mgħaġġla tiegħu fil-gradi tal-motorsport internazzjonali u jkompli jqiegħed lil Malta fuq il-mappa ta’ dan l-isport kompetittiv.
Lyndon McNeill for Hitech
