Fil-Parlament tressqu mistoqsijiet parlamentari dwar il-programm tal-PGTM (Preimplantation Genetic Testing for Monogenic Disorders), li jintuża flimkien mal-IVF biex jgħin koppji li huma f'riskju li jgħaddu mard ġenetiku serju lil uliedhom.
Skont it-tweġiba mogħtija mill-Ministru għas-Saħħa, l-applikazzjonijiet għall-PGTM ilhom jiġu aċċettati mill-2022 permezz tal-Awtorità għall-Protezzjoni tal-Embrijuni.
Il-mistoqsija parlamentari, imressqa mill-Onor. Romilda Zarb, staqsiet kemm kien hemm applikazzjonijiet, kemm ġew approvati u jekk kienx hemm kundizzjonijiet li wasslu biex xi applikazzjonijiet ma jiġux aċċettati.
Bi tweġiba, il-Ministru Ian Borg spjega li sal-lum ġew approvati 9 applikazzjonijiet, li jkopru tliet kundizzjonijiet ġenetiċi differenti:
- Huntington Disease
- Gangliosidosis
- Finnish Nephrotic Syndrome
Huwa żied li dawn l-applikazzjonijiet issa qed ikomplu l-proċess tal-IVF bil-għan li jsir il-PGTM, filwaqt li l-oħrajn għadhom fil-fażi ta' validazzjoni.
F'mistoqsija oħra, l-Onor. Romilda Zarb staqsiet ukoll kemm twieldu trabi permezz tal-proċess tal-IVF li kien jinkludi l-PGTM. Il-Ministru wieġeb li twieldet l-ewwel tarbija permezz ta' dan il-proċess.
L-introduzzjoni tal-PGTM tagħti tama ġdida lil koppji li jġorru mutazzjonijiet ġenetiċi serji, billi tippermetti li l-embrijuni jiġu ttestjati qabel l-impjantazzjoni.
Dan jista' jnaqqas b'mod sinifikanti r-riskju li ċertu mard ereditarju jgħaddi lit-tfal u joffri għażla medika addizzjonali lill-familji affettwati.
