L-Awtorità Maltija għat-Turiżmu (MTA) ordnat l-għeluq immedjat ta’ blokk ta’ appartamenti fis-Swieqi wara li spezzjonijiet ulterjuri kkonfermaw li numru sostanzjali ta’ appartamenti kienu qed joperaw bi ksur tal-kundizzjonijiet tal-liċenzja maħruġa mill-Awtorità.
L-ispezzjonijiet saru bħala parti minn programm kontinwu ta’ infurzar li l-MTA qed twettaq fis-Swieqi flimkien mal-Pulizija tal-Komunità u l-Kunsill Lokali tas-Swieqi. Dawn il-kontrolli diġà wasslu għal diversi azzjonijiet ta’ infurzar fejn instabu irregolaritajiet.
Wara l-aħħar spezzjonijiet fuq il-blokk ta’ appartamenti li kien diġà s-suġġett ta’ azzjoni ta’ infurzar, l-MTA kkonkludiet li kien hemm ksur serju tal-kundizzjonijiet marbuta mal-liċenzja. Għalhekk, l-Awtorità qed tibda proċeduri ta’ infurzar u tieħu l-miżuri legali kollha disponibbli kontra d-detentur tal-liċenzja.
L-MTA qalet li se tkompli twettaq spezzjonijiet simili mhux biss fis-Swieqi iżda wkoll f’lokalitajiet oħra madwar Malta, bil-għan li tiżgura li l-proprjetajiet kollha li joffru akkomodazzjoni għal kiri fuq żmien qasir ikunu konformi mar-regolamenti fis-seħħ.
L-Awtorità fakkret ukoll li, skont ir-regolamenti l-ġodda dwar l-akkomodazzjoni turistika, kull proprjetà li tinstab topera bħala short-let mingħajr il-liċenzja meħtieġa ma tkunx tista’ tapplika għal liċenzja għal perjodu ta’ tliet snin. Din il-miżura tapplika għall-proprjetà nnifisha u hija indipendenti minn kwalunkwe multa amministrattiva, penali jew proċeduri ġudizzjarji li jistgħu jittieħdu skont il-liġi.
