Ta’ 13-il sena biss, Chloe ħalliet lil Malta, lill-familja tagħha u l-ħajja li kienet imdorrija biha biex tibda kapitlu kompletament ġdid fir-Renju Unit. Pass mhux żgħir għal tfajla ta’ dik l-età, iżda wieħed li qed jagħtiha l-opportunità li tkompli tiżviluppa l-passjoni kbira tagħha għaż-żfin.
Il-Malta Arts Scholarship (MASS), iffinanzjata mill-Gvern ta’ Malta, qed tagħmilha possibbli għal Chloe li ssegwi programm ta’ taħriġ ta’ sentejn fi Tring Park School for the Performing Arts. Din hija skola speċjalizzata fejn l-arti performattiva tinsab fil-qalba tal-ħajja ta’ kuljum u fejn Chloe qed ikollha l-opportunità tkompli tiżviluppa t-talent tagħha f’ambjent professjonali. Il-bidu ma kienx nieqes mill-isfidi. Chloe kellha tadatta għal pajjiż ġdid, skola differenti u, fuq kollox, għall-ħajja bħala studenta residenti ’l bogħod mill-familja tagħha. Madankollu, hija ħarset lejn din il-bidla bħala opportunità biex tisfida lilha nnifisha u tikber mhux biss bħala żeffiena, iżda wkoll bħala persuna.
Fi Tring Park sabet ruħha mdawra b’żgħażagħ oħra li jaqsmu magħha l-istess passjoni u dedikazzjoni għaż-żfin. Chloe tispjega li din il-komunità tagħtiha motivazzjoni kontinwa, hekk kif l-istudenti jitgħallmu minn xulxin u jaqsmu ħafna mill-istess esperjenzi tul il-vjaġġ tagħhom. It-taħriġ tagħha jiffoka b’mod partikolari fuq iż-żfin klassiku, iżda jinkludi wkoll varjetà ta’ dixxiplini u stili oħra. Dan qed jgħinha tiżviluppa t-teknika, is-saħħa, il-koordinazzjoni, il-mużikalità u l-ħiliet tagħha fil-prestazzjoni. Il-varjetà fit-taħriġ qed tgħinha wkoll issir żeffiena aktar versatili u kapaċi tadatta għal stili differenti, kwalità importanti ħafna fl-industrija taż-żfin tal-lum.
Waħda mill-aktar lezzjonijiet importanti li tgħallmet s’issa hija li l-progress ma jiġix mil-lum għal għada. Jeħtieġ konsistenza, determinazzjoni u attenzjoni kbira għad-dettall. It-taħriġ intensiv ta’ kuljum iġib miegħu korrezzjonijiet u sfidi kontinwi, iżda Chloe tħoss li minn meta bdiet din l-esperjenza kibret kemm teknikament kif ukoll artistikament. Saret aktar b’saħħitha u kunfidenti, filwaqt li qed titgħallem tagħraf ukoll dawk l-oqsma fejn għad fadlilha x’ittejjeb. L-esperjenza fi Tring Park qed tgħallimha ħafna wkoll lil hinn miż-żfin. Li tlaħħaq mal-istudji akkademiċi flimkien ma’ taħriġ intensiv jirrikjedi dixxiplina, organizzazzjoni u ġestjoni tajba tal-ħin. Il-ħajja ’l bogħod mid-dar għenitha ssir aktar indipendenti u tieħu aktar responsabbiltà tagħha nnifisha.
Naturalment, ikun hemm ukoll mumenti fejn tħoss in-nuqqas tal-familja tagħha. Madankollu, Chloe tħoss li dawn l-esperjenzi qed jgħinuha tikber u, fl-istess ħin, tapprezza aktar l-opportunità li ngħatat. Il-vjaġġ tagħha fi Tring Park qed jipprovdilha pedament importanti għall-futur. Chloe tixtieq tkompli tiżviluppa kemm teknikament kif ukoll artistikament, tesperjenza metodi u stili differenti taż-żfin u tibqa’ tisfida lilha nnifisha sabiex tilħaq il-potenzjal tagħha. Iż-żmien tagħha barra minn Malta kompla jsaħħaħ ukoll il-kburija tagħha fl-għeruq Maltin.
Fil-futur, tittama li l-esperjenzi u l-għarfien li qed tikseb matul l-istudji tagħha tkun tista’ tużahom biex tagħti kontribut lix-xena taż-żfin u lill-arti performattiva f’Malta. Tixtieq ukoll li l-esperjenza tagħha tkun ta’ kuraġġ għal żeffiena żgħażagħ oħra biex ifittxu opportunitajiet li jistgħu jgħinuhom jikbru u jiżviluppaw it-talent tagħhom.
Chloe tinsab grata ħafna għall-appoġġ li rċeviet permezz tal-Malta Arts Scholarship (MASS), iffinanzjata mill-Gvern ta’ Malta, li ppermettitilha ssegwi dan il-programm ta’ taħriġ ta’ sentejn fi Tring Park School for the Performing Arts u tkompli tiżviluppa l-passjoni tagħha għaż-żfin f’ambjent speċjalizzat.
"Il-vjaġġ tiegħi għadu għaddej u għad hemm ħafna x’nixtieq nitgħallem u nikseb. Inħossni kburija bil-progress li għamilt, grata għall-opportunità li ngħatajt u eċitata biex nara fejn se twassalni l-passjoni tiegħi għaż-żfin," tgħid Chloe.
