It-temperaturi għoljin se jerġgħu jinħassu fit-temp Malti, b’temperaturi “li jinħassu” sa 42°C nhar il-Ħamis u l-Ħadd, skont it-tbassir tat-temp. Nhar l-Erbgħa, il-Ġimgħa u s-Sibt, it-temperatura mistennija tinħass madwar 41°C.
L-ogħla temperatura attwali mistennija, s’issa, hija ta’ 37°C nhar il-Ħamis. Madankollu, l-umdità għolja, flimkien mat-temperaturi sħan tal-baħar, qed tikkawża li t-temperatura li tinħass mill-ġisem tkun ferm ogħla minn dik irreġistrata attwalment, skont kif spjega kelliem għall-uffiċċju meterjoloġiku fl-Ajruport ta' Malta.
Is-sħana intensa hija marbuta mal-formazzjoni ta’ omega block, mudell atmosferiku persistenti li qed jifforma fuq l-Ewropa. Dan qed jikkontribwixxi biex antiċiklun Afrikan li ġej min-Nofsinhar tat-Tuneżija jiċċaqlaq lejn il-Mediterran, u b’hekk iġib miegħu massa ta’ arja sħuna.
Fid-dawl ta’ dawn il-kundizzjonijiet, l-uffiċċju meterjoloġiku aġġorna t-twissija tat-temp minn isfar għal oranġjo, bit-twissija estiża sal-Ħadd.
Is-sajf diġà kien ikkaratterizzat minn sħana mhux tas-soltu. F’Lulju, Malta esperjenzat tlett ijiem konsekuttivi b’temperaturi ta’ 42°C, filwaqt li t-temperatura laħqet rekord ta’ 43.3°C għal dak ix-xahar.
Bil-kundizzjonijiet sħan u umdi li mistennija jkomplu, il-pubbliku huwa mħeġġeġ joqgħod attent, partikolarment matul l-aktar sigħat sħan tal-ġurnata.
