Saint James Jinvesti €1.4 Miljun F’Cardiac Suite Ġdida Hekk Kif Qed Tiżdied Id-Domanda Għall-Kura Tal-Qalb

St James Image

Il-problemi tal-qalb m’għadhomx realtà li tolqot biss lill-anzjani. L-ispeċjalisti qed jinnotaw żieda fil-mard kardjovaskulari fost persuni iżgħar fl-età, u għalhekk il-prevenzjoni u l-identifikazzjoni bikrija qed isiru dejjem aktar importanti.

Il-kardjologu speċjalizzat Matthew Balbi jgħid li qed tiġi osservata xejra ’l fuq ta’ mard kardjovaskulari fost iż-żgħażagħ. Fost il-fatturi li jistgħu jikkontribwixxu għal dan hemm l-istress, l-obeżità, id-dijabete, it-tipjip u nuqqas ta’ attività fiżika. Il-mard tal-qalb jibqa’ fost l-akbar sfidi tas-saħħa f’Malta, b’Dr Balbi jiltaqa’ ma’ numru kbir ta’ pazjenti b’kundizzjonijiet bħall-mard tal-arterji koronarji, pressjoni għolja, arritmiji, insuffiċjenza tal-qalb u kundizzjonijiet strutturali tal-qalb.

Skont Dr Balbi, li wieħed jibda jieħu ħsieb saħħet qalbu tagħmel differenza kbira fit-tul. Eżerċizzju regolari, dieta bilanċjata, irqad adegwat u kontroll tal-istress jistgħu jgħinu biex jitnaqqas ir-riskju ta’ attakki tal-qalb u puplesiji aktar ’il quddiem fil-ħajja. Fl-istess waqt, qed tiżdied ukoll il-kuxjenza fost il-pubbliku. Aktar nies qed ifittxu li jagħmlu eżamijiet preventivi u screenings tal-qalb qabel ma jiżviluppaw problemi aktar serji.

Dan qed iseħħ fl-isfond ta’ investiment ġdid ta’ €1.4 miljun minn Saint James Hospital f’Cardiac Suite ġdida fiż-Żejtun. “Hemm għarfien dejjem jikber fost il-pubbliku dwar is-saħħa tal-qalb, l-identifikazzjoni bikrija u l-immaniġġjar tal-fatturi ta’ riskju,” jgħid Dr Balbi. Skont il-kardjologu, il-faċilità l-ġdida se tippermetti li pazjent jingħata servizz aktar komplut fl-istess post, mill-evalwazzjoni u d-dijanjosi sal-intervent u s-segwitu.

“Din il-faċilità l-ġdida se tkun standard għoli ħafna għat-trattamenti invażivi u l-proċeduri dijanjostiċi lokalment. Se tgħolli l-livell tal-kura privata tal-qalb f’Malta għal livell kompletament ġdid,” jgħid Dr Balbi. Il-Kap Eżekuttiv ta’ Saint James Hospitals, Jean Claude Muscat, jgħid li l-investiment għandu l-għan li jikkumplimenta s-servizz nazzjonali tas-saħħa u joffri aktar għażliet lill-pazjenti.

Minħabba l-inċidenza għolja ta’ kundizzjonijiet relatati mal-qalb f’Malta, Saint James qed jistenna domanda sostanzjali għal investigazzjonijiet dijanjostiċi u interventi fil-Cardiac Suite l-ġdida. Muscat spjega li wħud mill-proċeduri li se jkunu jistgħu jsiru f’Saint James sa issa setgħu jsiru biss fl-Isptar Mater Dei. Dan ifisser li pazjent li jkun sofra attakk tal-qalb ikun jista’ jiġi dijanjostikat, investigat u trattat fl-istess sptar u fi żmien qasir minn meta jasal fid-Dipartiment tal-Emerġenza.

Saint James Hospitals bħalissa jipprovdi medja ta’ madwar 600,000 servizz mediku fis-sena. Għal Dr Balbi, iżda, il-Cardiac Suite mhix biss investiment fit-teknoloġija. Huwa jisħaq ukoll fuq l-esperjenza tal-pazjent f’mument li jista’ jkun mimli biża’ u stress. “L-investigazzjonijiet tal-qalb jistgħu jinftiehmu li jkunu stressanti, għalhekk li jkollok il-konsultazzjonijiet, id-dijanjosi, il-proċeduri u l-irkupru kkoordinati kollha f’post wieħed inaqqas l-inċertezza u l-frammentazzjoni tal-kura,” jgħid.

Hekk kif il-problemi kardjovaskulari qed jidhru wkoll f’etajiet iżgħar, il-messaġġ tal-ispeċjalisti jibqa’ wieħed ċar - il-prevenzjoni, l-identifikazzjoni bikrija u trattament fil-ħin jistgħu jagħmlu differenza kbira.

Ixxerja

STEJJER OĦRA

AQRA IKTAR

PARTNERS UFFIĊJALI