Diversi lokalitajiet madwar Malta mistennija jaraw titjib sostanzjali fl-infrastruttura u fl-ispazji pubbliċi tagħhom, hekk kif għall-2027 huwa ppjanat investiment ta’ €162.3 miljun f’għadd ta’ proġetti u inizjattivi.
Il-Ministru għall-Infrastruttura, l-Ippjanar u x-Xogħol, Dr Jonathan Attard, ta ħarsa lejn il-proġetti ewlenin li jinsabu għaddejjin jew li mistennija jitwettqu fix-xhur li ġejjin, b’enfasi fuq il-kwalità tal-ħajja tar-residenti.
L-Imsida u Marsaskala fost il-proġetti ewlenin
Wieħed mill-akbar proġetti huwa dak tal-Imsida Creek, li mistenni jitlesta fit-tieni nofs tal-2027. Il-pjazza l-ġdida diġà tlestiet, filwaqt li qed tinħoloq konnessjoni pedonali bejn Ta’ Xbiex u l-Marina. It-tielet pont, li se joħloq rotta diretta minn Birkirkara lejn il-Belt Valletta, jinsab madwar 90% komplut.
F’Marsaskala, għaddejja r-riġenerazzjoni tal-promenade fuq medda ta’ kilometru u nofs, b’madwar 600 metru diġà lesti. Il-proġett jinkludi spazji ħodor, dawl ġdid u titjib fl-ispazji pubbliċi. Hemm ukoll pjanijiet għal terminal tal-fast ferry li jgħaqqad Marsaskala mal-Belt Valletta.
Toroq aktar aċċessibbli u investiment fl-ambjent
Permezz tal-programm Vjal Kulħadd, qed isiru interventi f’diversi lokalitajiet, fosthom iż-Żejtun, Ħaż-Żabbar, Ħal Tarxien, Ħal Luqa, il-Gudja u Ħ’Attard. Aktar xogħlijiet huma ppjanati fir-Rabat, fin-Naxxar, fil-Furjana u fis-Siġġiewi.
Fil-qasam marittimu, kważi €50 miljun huma allokati għall-2027. Fost il-proġetti hemm sistemi li jippermettu lill-vapuri jużaw l-elettriku mix-xatt, bil-għan li jitnaqqas it-tniġġis fil-portijiet.
Restawr u aktar opportunitajiet għall-familji
Dr Attard semma wkoll investiment ta’ €35 miljun fir-restawr tal-wirt arkitettoniku Malti, filwaqt li qed jiġu riveduti l-politiki tal-ippjanar biex tingħata aktar attenzjoni lill-kwalità tal-abitazzjonijiet u l-ispazji esterni.
Fil-qasam tax-xogħol, il-programm MySkills diġà laħaq 620 parteċipant, b’għajnuna sa €5,000 għal taħriġ professjonali. Sadanittant, il-Free Childcare Scheme kienet laħqet aktar minn 40,600 tifel u tifla sa tmiem l-2025.
Skont il-Ministru Jonathan Attard, dawn l-investimenti għandhom l-għan li joħolqu komunitajiet aktar aċċessibbli, siguri u sostenibbli, b’titjib li jinħass fil-ħajja ta’ kuljum tal-familji Maltin.