Kultant, l-isbaħ stejjer jibdew wara l-aktar mumenti diffiċli. Din hija l-istorja ta’ Abbey, kelba li wara li ġiet salvata minn kundizzjonijiet ħżiena, issa qed tingħata ċ-ċans li tibda ħajja ġdida.
Wara li ġiet salvata mit-tim tal-konfiska tal-Animal Welfare, Abbey issa qed tħalli warajha dan il-kapitlu diffiċli biex tibda vjaġġ ġdid lejn l-irkupru. Hija se titlaq mill-Animal Welfare u tmur lejn l-MSPCA, fejn se tirċievi l-kura u r-riabilitazzjoni li teħtieġ.
Għalkemm ma nafux minn xiex għaddiet Abbey, nistgħu biss nittamaw li minn issa ’l quddiem issib il-kura, is-sigurtà u l-imħabba li kull annimal jistħoqqlu. Tifħir speċjali jmur lit-tim tal-konfiska tal-Animal Welfare, li permezz tal-ħidma tiegħu qed jagħti lil dawn il-klieb it-tieni ċans fil-ħajja.
L-isem Abbey ingħatalha bħala bidu ġdid għal kapitlu li jixraq ikun mimli mħabba u tama għax kull annimal jistħoqqlu li jħossu protett, maħbub u sigur, u għal Abbey, illum jista’ jkun il-bidu ta’ storja ferm isbaħ.
Facebook/MSPCA
