Il-preżentatur Keith Demicoli qasam messaġġ mill-qalb fuq il-midja soċjali biex ifakkar lil missieru, li kieku llum kien jagħlaq 66 sena. Permezz ta’ sensiela ta’ ritratti mill-album tal-familja, Keith irrakkonta kif it-telfa ta’ missieru minn età żgħira bidlitlu ħajtu u għallmitu lezzjonijiet li għadu jġorr miegħu sal-lum.
Keith spjega li missieru miet meta kellu biss 31 sena, filwaqt li hu kien għadu tifel ta’ disa’ snin. Minkejja li l-familja ma kellhiex ħafna ġid materjali, jistqarr li dak iż-żmien lanqas biss kienu jindunaw b’dan, għaliex dak li kellhom kien biżżejjed biex iħossuhom id-dar.
It-telfa ta’ missieru ġiegħlitu jimmatura qabel iż-żmien u għallmitu affarijiet li, kieku ċ-ċirkostanzi kienu differenti, seta’ dam għexieren ta’ snin biex jifhimhom. Keith irrakkonta wkoll kif dak iż-żmien kien konvint li l-futbol kien se jkun il-futur tiegħu. Madankollu, mingħajr ma kien jaf, il-ħajja kienet diġà qed tagħtih indikazzjonijiet dwar triq differenti. Snin wara, huwa sab ruħu jippreżenta l-aħbarijiet tat-tmienja ta’ filgħaxija, realtà li qatt ma seta’ jimmaġina meta kien għadu tifel.
Fil-messaġġ tiegħu, Keith għażel li jiġbor din l-esperjenza fi frażi Maltija li ġġorr tifsira profonda: “Fortuna fl-isfortuna.” Huwa rrifletta dwar kif il-ħajja mhux dejjem tagħtina l-istorja li nkunu nixtiequ ngħixu, iżda xi drabi jkunu biss is-snin li jgħaddu li jgħinuna nifhmu x’tkun tatna dik l-esperjenza, minkejja l-uġigħ li tkun ġabet magħha.
Messaġġ tassew emozzjonanti li jfakkarna li t-telfa ta’ persuna għażiża tħalli vojt li ma jimtela qatt, iżda l-imħabba, il-memorji u l-lezzjonijiet li tħallilna jistgħu jibqgħu jakkumpanjawna tul ħajjitna kollha.
Facebook / Keith Demicoli
