L-Ajruport Internazzjonali ta’ Malta kompla jirreġistra tkabbir matul l-2025, hekk kif laqa’ aktar minn 10 miljun passiġġier, żieda ta’ 12.3% meta mqabbla mas-sena ta’ qabel. Minkejja dan, l-ajruport irnexxielu jnaqqas l-emissjonijiet tal-karbonju għal kull passiġġier bi 3%.
Dan joħroġ mill-aħħar rapport dwar is-sostenibbiltà, li juri wkoll li d-dħul tal-ajruport żdied b’9.9% biex laħaq il-€157 miljun, filwaqt li l-investiment kapitali ammonta għal €61.6 miljun.
Fost l-inizjattivi ambjentali ewlenin kien hemm il-bidu tat-tħaddim tal-ħames impjant fotovoltajku, li jinkludi aktar minn 10,000 pannella solari u li mistenni jiġġenera madwar 5.1 miljun kilowatt-siegħa ta’ elettriku nadif kull sena. Barra minn hekk, kważi 30% tal-flotta tal-vetturi tal-ajruport issa hija magħmula minn vetturi b’emissjonijiet aktar baxxi.
Ir-rapport juri wkoll li l-konsum tal-ilma naqas b’9%, filwaqt li l-ġbir tal-ilma tax-xita żdied b’175%. Ġiet irreġistrata wkoll żieda ta’ 9.7% fl-iskart riċiklat. Madankollu, il-konsum tal-fjuwil żdied bi 32%, l-aktar minħabba ż-żieda fl-attività operattiva.
Matul is-sena saru wkoll diversi investimenti fl-infrastruttura, fosthom estensjoni ta’ Apron 8, xogħlijiet ta’ riabilitazzjoni f’żoni tal-ajruplani u l-ftuħ ta’ terminal ġdid għall-VIP. Ingħata bidu wkoll għall-kostruzzjoni ta’ SkyParks 2.
Fejn tidħol l-esperjenza tal-passiġġieri, l-ajruport qabeż il-medja Ewropea fil-31 indikatur kollha tal-Airport Service Quality, filwaqt li għat-tmien sena konsekuttiva baqa’ fost l-aqwa ajruporti Ewropej fil-kategorija tad-daqs tiegħu.
Sal-aħħar tal-2025, l-ajruport kellu 538 impjegat, filwaqt li approva aktar minn €220,000 f’donazzjonijiet għal inizjattivi differenti.
Dawn ir-riżultati jirriflettu sena pożittiva għall-Ajruport Internazzjonali ta’ Malta, kemm f’termini ta’ tkabbir kif ukoll ta’ investiment u sostenibbiltà.
Facebook / Malta International Airport
