Xahar wara li s-servizz tat-trasport pubbliku f'Għawdex sar kompletament elettriku, il-Malta Public Transport ħabbret li saru aktar minn 332,000 vjaġġ mill-passiġġieri fuq total ta' 16,220 vjaġġ tal-karozzi tal-linja. Din tirrappreżenta żieda ta' 11% fl-użu tas-servizz meta mqabbel mal-istess perjodu tas-sena li għaddiet, u turi interess dejjem jikber fit-trasport pubbliku mingħajr emissjonijiet.
B'dan il-pass, Għawdex saret l-ewwel gżira fl-Ewropa li topera flotta tat-trasport pubbliku kompletament elettrika. L-inizjattiva hija wkoll l-akbar investiment li qatt sar fit-trasport pubbliku fil-gżira.
Dawn huma l-ewwel riżultati minn meta tlesta l-proċess ta' elettrifikazzjoni tan-netwerk kollu tal-karozzi tal-linja f'Għawdex. Il-vetturi li qabel kienu jaħdmu bid-dijżil ġew sostitwiti b'karozzi tal-linja elettriċi moderni, appoġġjati minn infrastruttura ġdida għall-iċċarġjar.
Minbarra ż-żieda fin-numru ta' passiġġieri, il-proġett qed iħalli wkoll impatt pożittiv fuq l-ambjent. Huwa stmat li l-flotta elettrika se telimina madwar 1,300 tunnellata ta' dijossidu tal-karbonju kull sena, filwaqt li toffri servizz aktar kwiet u nadif għar-residenti u l-viżitaturi.
Il-General Manager tal-Malta Public Transport, Konrad Pulé, qal li l-ewwel xahar tal-operat juri biċ-ċar li t-tranżizzjoni lejn il-mobilità elettrika qed tintlaqa' tajjeb kemm mir-residenti kif ukoll mill-viżitaturi.
"Il-fatt li saru aktar minn 332,000 vjaġġ mill-passiġġieri huwa sinjal inkoraġġanti ta' fiduċja dejjem tikber fit-trasport pubbliku. Dawn ir-riżultati juru li sostenibbiltà ambjentali u servizz effiċjenti jistgħu jimxu id f'id għall-ġid tal-komunità u tal-ambjent," sostna Pulé.
L-investiment ta' €11-il miljun, li tnieda x-xahar li għadda, wassal biex il-flotta kollha tal-karozzi tal-linja li kienet taħdem bid-dijżil tinbidel għal vetturi elettriċi b'żero emissjonijiet. Fl-istess ħin inbniet infrastruttura ġdida għall-iċċarġjar fid-depot li jinsab fil-Faċilità tal-Park and Ride f'Ta' Xħajma.
Dan il-proġett twettaq permezz ta' kollaborazzjoni bejn il-Malta Public Transport, il-Ministeru għat-Trasport, l-Infrastruttura u x-Xogħlijiet Pubbliċi, l-Awtorità għat-Trasport f'Malta u d-Direttorat Eco-Gozo fi ħdan il-Ministeru għal Għawdex.
Facebook / Tallinja
