Is-Soċjetà Filarmonika Gran Mastru Fra Antoine De Paule – Banda Kristu Re ser torganizza kunċert kommemorattiv bl-isem ta’ Casal Nuovo: Eku ta’ erba’ sekli, li se jsir nhar il-Ġimgħa 9 t’Ottubru fil‑Konkatidral ta’ San Ġwann, taħt il‑patroċinju tal‑E.T. il‑President ta’ Malta Myriam Spiteri Debono. L‑avveniment ifakkar l‑400 sena mit‑twaqqif ta’ Paola mill‑Gran Mastru Fra Antoine De Paule u jagħti ġieħ lill‑wirt storiku, kulturali u spiritwali tal‑komunità Pawlista.
Avveniment rari
Dan il-kunċert, li se jsir propju fil-post fejn jinsab midfun il-fundatur ta’ Paola, huwa okkażjoni rari peress li ftit huma s-soċjetajiet mużikali li jiksbu l‑privileġġ idoqqu f’dan il‑monument storiku ta’ sinifikat nazzjonali.
Kunċert f’ħames atti
Casal Nuovo: Eku ta’ erba’ sekli huwa kunċert f’ħames atti qosra li jistieden lill‑udjenza tgħix l‑istorja ta’ Paola bħala ark kontinwu mill‑għeruq preistoriċi, għall‑gwerra u l‑bidliet nazzjonali, sal‑komunità ħajja tal‑lum, u l‑futur li għad irid jiżvolġi.
Banda Simfonika Kristu Re
Il-Banda Kristu Re ser tkun il-protagonista tas-serata – banda simfonika meqjusa u rispettata lokalment, immexxija mis‑Surmast Pawlist David Joseph Sammut, li kiseb stima nazzjonali għad-direzzjoni mużikali espressiva tiegħu, għall-interpretazzjonijiet raffinati, u għall‑kontribut tiegħu fix-xena mużikali Maltija permezz ta’ bosta kompożizzjonijiet oriġinali
Il‑Banda ser tesebixxi għażla rikka ta’ mużika barokka, romantika u kontemporanja, b’siltiet ta’ Mahler, Puccini, Rossini, Stivala, u oħrajn, inkluż xi xogħlijiet li qatt qabel ma ndaqqew minn banda Maltija. Il-programm jinkludi xi xogħlijiet oriġinali mill‑pinna tas-Surmast Sammut, inkluż kompożizzjoni ġdida għall-ftuħ tal-kunċert – mument ta’ valur artistiku u professjonali f’dan il‑katidral prestiġjuż.
Proża poetika
Il‑ħames atti huma magħqudin permezz ta’ proża poetika oriġinali bil‑Malti miktuba mill‑Professur Immanuel Mifsud, Pawlist, kittieb rebbieħ ta’ bosta premjijiet, professur universitarju rispettat, u rebbieħ tal‑2026 Homer European Medal of Poetry and Art. Il‑vuċi letterarja tiegħu toħloq sfond storiku u emozzjonali lil kull att, u tgħaqqad il‑mużika u l‑proża f’esperjenza waħda koerenti.
Artisti distinti
Jissiebħu mal-Banda Kristu Re tliet artisti distinti Maltin: it-tenur Alan Sciberras, il-kantanta Lisa Gauci – rebbieħa ta’ X Factor Malta Back to Win, u l-attriċi Marceline Galea bħala narratriċi tal-proża poetika.
Esperjenza unika għall-komunità
Casal Nuovo: Eku ta’ erba’ sekli huwa esperjenza unika għall-komunità Pawlista u Maltija li tiċċelebra l-wirt storiku u kulturali ta’ Paola u l-viżjoni tal-fundatur tagħha – wirt li l-eku tiegħu għadu jidwi ma’ Raħal Ġdid erba’ sekli wara.
Dħul b’xejn
Il‑kunċert huwa miftuħ għall‑pubbliku b’xejn, sabiex il‑komunità kollha tkun tista’ tieħu sehem f’din iċ‑ċelebrazzjoni kulturali nazzjonali. Il‑postijiet jistgħu jiġu rriservati permezz ta’ showshappening.com
