Renato Vella qed jiċċelebra għeluq it-12-il sena tiegħu ma' ONE, tragward li fakkru fil-vjaġġ professjonali tiegħu u fil-mixja li wasslitu biex illum jokkupa rwol ewlieni fi ħdan l-istazzjon. F'messaġġ li qasam fuq il-midja soċjali, Renato ddeskriva dawn is-snin bħala esperjenza li bdiet minn passjoni li kellu sa minn żgħożitu u li maż-żmien inbidlet fil-professjoni tiegħu.
"Dak li beda bħala passjoni u opportunità biex insegwi dak li tassew inħobb meta kont adolexxenti, illum sar il-karriera full-time tiegħi," kiteb. Huwa qal li meta jħares lura jħoss gratitudni kbira għall-esperjenzi, l-isfidi u l-opportunitajiet kollha li sawru l-vjaġġ tiegħu matul dawn it-12-il sena.
Illum Renato jservi bħala Radio Operations Lead fi ħdan ONE, kariga li, kif stqarr hu stess, iħaddanha b'kburija, responsabbiltà u impenn kbir. Fi tmiem il-messaġġ tiegħu, Renato rringrazzja lill-maniġment, lill-kollegi, lis-semmiegħa u lit-telespettaturi kollha li tul is-snin appoġġjawh, emmnu fih u ħeġġewh ikompli jikber professjonalment.
Huwa temm billi qal li jħares 'il quddiem biex ikompli jagħti l-aħjar tiegħu kuljum, filwaqt li jibqa' jservi lill-udjenzi ta' ONE bl-istess dedikazzjoni li mexxietu sa mill-bidu tal-karriera tiegħu.
Facebook / Renato Vella
