F’Jum Dinji għall-Prevenzjoni tas-Suwiċidju, Nickie Vella De Fremeaux għażlet li taqsam esperjenza personali ħafna sabiex tqajjem aktar għarfien dwar id-dipressjoni u tfakkar li mhux dejjem nistgħu nagħrfu minn xiex tkun għaddejja persuna sempliċement minn dak li naraw minn barra. Nickie żvelat li ilha kważi 22 sena tissielet mad-dipressjoni, iżda llum tista’ tgħid b’kuraġġ, “Jien għadni hawn u għadni wieqfa.”
Hija spjegat li ma qasmitx l-esperjenza tagħha biex tiġbed is-simpatija, iżda biex twassal messaġġ importanti, id-dipressjoni m’għandhiex wiċċ wieħed. Persuna tista’ titbissem, tidħaq, taħdem, tħobb u tkompli bil-ħajja tagħha, filwaqt li minn ġewwa tkun għaddejja minn battalja li ftit nies ikunu jafu biha.
Nickie saħqet ukoll li d-dipressjoni mhux dejjem timmanifesta ruħha bħala dwejjaq kbir. Fil-każ tagħha, tiddeskrivi lilha nnifisha bħala persuna pożittiva, kalma, ferħana u li tħobb il-ħajja, iżda dan ma jfissirx li d-dipressjoni ma tistax tolqotha. “Ma tiddiskriminax. Tista’ tiġri lil kulħadd,” sostniet, filwaqt li appellat biex tintemm l-istigma marbuta mas-saħħa mentali. Hija fakkret li d-dipressjoni ma tagħmilx lil persuna dgħajfa jew inqas denja, u li m’għandu jkun hemm ebda mistħija f’li wieħed jammetti li qed ibati jew jitlob l-għajnuna.
L-appell tagħha kien ukoll indirizzat lill-familjari u l-ħbieb. Nickie ħeġġithom biex jafdaw l-istint tagħhom meta jħossu li xi ħaġa mhix sew, jistaqsu, jisimgħu, ikunu preżenti u jgħinu lill-persuna tfittex l-għajnuna meħtieġa. “Is-suwiċidju qatt mhu t-tweġiba. Hemm għajnuna, hemm tama, hemm dawl fit-tarf ta’ dik il-mina mudlama,” kitbet Nickie, filwaqt li sejħet lilha nnifisha “prova ħajja” li wieħed jista’ jibqa’ jiġġieled u jimxi ’l quddiem.
Temmet billi qalet li jekk il-qsim mill-ġdid tal-esperjenza tagħha jgħin imqar persuna waħda titkellem dwar dak li tkun għaddejja minnu, allura jkun kien jiswa li taqsamha.
Facebook / Nickie Vella De Fremeaux
