Il-kantawtur Malti Victorio Gauci għadu kif nieda kanzunetta ġdida, miktuba minn Victorio stess flimkien mal-artista Emma Muscat. Il-produzzjoni saret minn Cyprian Cassar f’Somnio Studios, filwaqt li Keith Kiko Muscat f’BIRTH Studios ħadem fuq il-vuċi u l-mix finali.
Il-kanzunetta twassal vjaġġ emozzjonali minn dlam u biża’ għall-imħabba u saħħa. Tispjega kif, bl-appoġġ ta’ xi ħadd ieħor, wieħed jista’ jegħleb l-ostakli u jirbaħ fuq l-isfidi li jiltaqa’ magħhom fil-ħajja. Il-messaġġ hu wieħed ċar: l-mħabba kapaċi ddawwal l-iktar mumenti mudlama u tispira tkabbir personali.
Ritratt: Monique Gatt
Victorio Gauci, ilu jħalli l-marka tiegħu fuq ix-xena mużikali lokali għal bosta snin. Huwa kien frontman għal 14-il sena ta’ band lokali, li matul dak iż-żmien irnexxielhom jirrilaxxaw żewġ albums mimlijin singles li laħqu l-quċċata tal-klassifiki u li rebħuhom numru ta’ premjijiet. Barra minn hekk, Victorio pparteċipa f’diversi festivals u avvenimenti mużikali madwar Malta, fejn ikollaboraw miegħu mużiċisti magħrufa.
Riċentement, huwa kien parti mill-grupp JVF fil-Malta Eurovision Song Contest, fejn kisbu ħames post bil-kanzunetta sajfija Festa (No Time for Siesta). Illum, filwaqt li hu missier ta’ tliet itfal u jaħdem full-time, Victorio qed jiffoka fuq il-karriera solo tiegħu u jfittex orizzonti artistiċi ġodda, waqt li jibqa’ attiv b’kunċerti madwar il-gżejjer Maltin.
Il-ħidma tiegħu turi li, minkejja l-isfidi, il-passjoni vera għall-mużika tibqa’ hemm.
Monique Gatt
