Għal Melanie, Jum il-Milied qatt ma kien sempliċiment data fil-kalendarju. Jum li dejjem fisser familja, tradizzjoni u mumenti sempliċi li, minkejja li jerġgħu jirrepetu ruħhom kull sena, jibqgħu jġibu magħhom sens qawwi ta’ ġmiel.
“Il-Milied dejjem kont ngħaddih mal-familja”
Meta staqsejnieha x’memorji għandha minn dan il-jum, meta kienet għadha żgħira, Melanie tgħid li l-Milied dejjem kien marbut mal-familja. Tiftakar b’għożża kbira l-ġranet fid-dar in-nanna u n-nannu tagħha, mdawra biz-zijiet u l-kuġini – f’atmosfera storbjuża, ftit kaotika, imma “d-dar”.
Fil-memorji tagħha, hemm dettalji li baqgħu f’moħħha: ir-riħa tad-dundjan fil-forn, u n-nannu jkantalha White Christmas waqt li kulħadd jitkellem u jidħaq. U hemm ukoll mument ieħor li tqisu maġiku fil-faċilità tiegħu: meta kienet tkun fil-karozza ta’ missierha fi żmien il-Milied, tħares lejn id-dwal jixegħlu fil-gallariji u t-twieqi u tħoss dak il-ferħ żgħir li jibqa’ f’qalbek.
“Il-Milied bħala pawża mill-ħajja mgħaġġla”
Għaliha, il-Milied ma jfissirx spettaklu jew ġiri. Ifisser li tnaqqas ir-ritmu u tassew tkun flimkien. Iva, hemm ir-rigali, imma tgħid ċar li qatt ma kien hemm l-enfasi fuqhom.
“Il-Milied mhux dwar x’tixtri jew x’tirċievi,” tispjega, “imma dwar li tkun preżenti — mingħajr telefonati, emails jew impenji oħra. F’Jum il-Milied, donnu l-ħin jieqaf.”
Interessanti wkoll li Melanie tgħid li binha jħobb l-istess ritmu u l-istess tradizzjonijiet, u din il-konsistenza turi s-sens ta’ mħabba li jibqa’ hemm.
It-tradizzjoni tal-ikel: id-dundjan mimli u l-Christmas log
Meta niġu għall-ikel, Melanie ma taħbix li tħobb it-tradizzjoni: dundjan mimli, u wara ma jistax jonqos il-Christmas log.
Imma meta niġu għat-tisjir, hi tidħaq u tgħid li mhux eżatt il-forte tagħha, u lanqas isib ruħha tgawdi l-ħin fil-kċina f’Jum il-Milied. Kif tħobb tiddeskriviha hi stess, aktar tapprezza l-festa milli toħloqha.
Ix-xewqa ta’ Melanie għan dan iż-żmien!
Ix-xewqa ta’ Melanie għal dan iż-żmien hija waħda ċara: li n-nies inaqqsu l-ħajja mgħaġġla u jkunu preżenti ma’ min iħobbu. Tgħid li l-Milied għandu jkun dwar konnessjoni, daħk u sens ta’ appartenenza, u tħeġġeġ lill-qarrejja biex jgħożżu l-mumenti sempliċi, it-tradizzjonijiet familjari u l-għożża tal-familja.
U għal min din is-sena ma għandux lill-familja viċin, Melanie tħalli messaġġ sensittiv: li xorta jistgħu jsibu l-ispirtu tal-Milied fil-ħbiberija, fit-tjubija, jew anke f’mument ta’ paċi. Għax, kif tgħid hi, il-Milied jista’ jinstab fl-iżgħar ġesti, f’tbissima u jew fis-serħan li jġib miegħu l-għarfien li qatt m’aħna waħedna tassew.
U finalment, Melanie tagħlaq b’ħsieb sabiħ: anke jekk kull Milied jidher qisu eku ta’ dak ta’ qabel, hemm ġmiel f’dik il-konsistenza, għax tfisser li l-imħabba baqgħet soda, u dik hi xi ħaġa li ta’ min jiċċelebraha.
Il-pjanijiet ta’ Melanie għas-sena 2026
Dwar il-pjanijiet tagħha, Melanie tagħmilha ċara li tixtieq tkompli tintervista aktar mistednin bi stejjer ta’ spirazzjoni fuq Kellymni, stejjer li jistgħu jmissu l-qlub u jqajmu kuraġġ.
Mhux hekk biss: hi wkoll eċċitata għat-tnedija tat-talk show il-ġdid tagħha, POV, li jibda f’Jannar fuq TVM u se jkun kull nhar ta’ Tnejn fil-23:00.
Fuq livell personali, Melanie tħares ’il quddiem biex issib il-ħin iżżur pajjiżi tal-Lvant, u wkoll tivvjaġġa aktar ma’ binha biex joħolqu memorji ġodda flimkien. Tgħid ukoll li tixtieq tibni aktar relazzjonijiet sinifikanti, dawk li jġibu konnessjoni ġenwina u jimlew ruħek b’ferħ.
Fuq kollox, tħares ’il quddiem biex tkompli tiskopri lilha nnifisha, tikber u trawwem imħabba aktar profonda fiha nfisha.
Għax, kif tgħid hi, kull sena ġdida, bħall-Milied, ifakkarna li l-ħajja mhix dwar il-perfezzjoni jew il-pass li naqbdu, imma dwar il-preżenza, l-iskop, il-paċi u n-nies li jagħmlu kollox ta’ valur.
Facebook / Melanie Kelly
