Illum, 20 ta’ Settembru, il-komunità ta’ San Ġiljan tfakkar il-memorja ta’ Anġlu Pullicino, li miet bħal-lum fl-1979.
Kien l-ewwel surmast tal-Banda San Ġiljan u kellu rwol importanti fit-twaqqif u fl-iżvilupp tagħha. Kien beda jgħallem lill-allievi tal-banda tad-Domus, li fl-1927 saret il-Banda San Ġiljan, u dam imexxiha għal 43 sena, bejn l-1927 u l-1970.
Matul dawn is-snin, għexieren ta’ bandisti ta’ kalibru ħarġu minn taħt idejh, b’ħafna minnhom ikomplu jikkontribwixxu għall-qasam mużikali Malti.
Anġlu twieled fl-10 ta’ Diċembru 1904 f’Birkirkara u studja l-mużika taħt is-Surmast Vincenzo Costa, filwaqt li studja l-armonija taħt is-Surmast Gużeppi Abdilla.
Hu jibqa’ mfakkar ukoll għall-ħafna marċi u innijiet li kkompona, fosthom l-Innu tal-Banda San Ġiljan u l-Innu Popolari ta’ San Ġiljan, xogħlijiet li saru parti mill-wirt mużikali tal-lokalità.
B’hekk, aktar minn erba’ deċennji wara mewtu, il-kontribut tiegħu għadu jgħix permezz tal-mużika u tal-baned Maltin li jkomplu jżommu ħaj il-wirt li ħalla warajh.
