Christa Cilia tkellmet pubblikament wara li nhar il-Ħadd erba’ uffiċjali tal-Animal Welfare marru fid-dar tagħha għall-għarrieda, wara rapport li sar minħabba tħassib dwar in-numru ta’ klieb li jgħixu magħha. Christa spjegat li inizjalment ma kellhiex l-intenzjoni li titkellem dwar l-ispezzjoni, iżda wara li l-preżenza tal-Animal Welfare ġiet innutata minn persuni fl-inħawi, ħasset li kien aħjar li tispjega hi stess x’ġara.
Skont Christa, l-uffiċjali daħlu fid-dar, raw il-klieb kollha u spezzjonaw il-kundizzjonijiet li jgħixu fihom. Hija qalet li sabu dar nadifa u klieb f’kundizzjoni tajba, kuntenti u kkurati sew. “Għal kull min kien ġenwinament imħasseb dwar il-benesseri tagħhom, naħseb li dan jitkellem waħdu,” kitbet. Christa rringrazzjat ukoll lill-erba’ uffiċjali tal-Animal Welfare, li ddeskriviet bħala ġentili, rispettużi u li fehmu s-sitwazzjoni. Hija saħqet li kellhom xogħol x’jagħmlu u apprezzat il-mod kif wettquh.
Fil-messaġġ tagħha, Christa fakkret ukoll fir-relazzjoni li kellha mal-Animal Welfare tul is-snin. Hija qalet li fostered klieb f’isimhom, adottat klieb li kienu fil-kura tagħhom u għenet diversi drabi biex jinqabdu klieb mit-toroq, partikolarment dawk imbeżżgħin li kienu jeħtieġu ħafna paċenzja biex jafdaw lill-bniedem. Madankollu, hija sostniet li għal kważi 12-il sena, ir-responsabbiltà li tiġi wara s-salvataġġ tal-annimali kienet prinċipalment fuqha u fuq żewġha. Semmiet fost l-oħrajn l-ispejjeż tal-ikel, il-kura veterinarja, it-tindif, każijiet diffiċli u r-responsabbiltà fit-tul.
Christa qalet li fil-fatt tinsab kuntenta li saret l-ispezzjoni, għaliex issa l-Animal Welfare seta’ jara b’għajnejh il-mod kif jgħixu l-klieb tagħha. Fl-istess waqt, iżda, qalet li din is-sitwazzjoni enfasizzat punt li tqis importanti. “Għal snin konna hemm meta kelb kellu bżonn l-għajnuna. Issa qed niġu nnutati minħabba kemm minnhom eventwalment kellhom bżonn l-għajnuna tagħna,” kitbet.
Hija appellat biex persuni li kontinwament jidħlu għar-responsabbiltà li jgħinu lill-annimali ma jingħatawx attenzjoni biss meta n-numru ta’ annimali fil-kura tagħhom iqajjem tħassib, iżda jingħataw ukoll l-appoġġ u l-gwida meħtieġa biex ikunu jistgħu jkomplu jagħmlu dan ix-xogħol. “L-ispezzjoni għandha postha. L-appoġġ għandu jkollu postu wkoll,” sostniet Christa.
Hija temmet billi reġgħet assigurat lil dawk li setgħu kienu mħassba dwar il-klieb tagħha li l-Animal Welfare ra r-realtà b’għajnejh, “Dar nadifa. Klieb kuntenti u kkurati sew. Id-dar tagħna hija d-dar tagħhom ukoll.”
Facebook / Christa Cilia
